Brim ætlar að endurskoða verkferla sína og segist harma það hvernig staðið var að brottrekstri sjómannsins Boga Theodórs Ellertssonar hjá fyrirtækinu í tilkynningu sem birtist á vefsíðu útgerðarinnar.
Bogi Theodór missti vinnuna eftir að hafa skilað inn veikindavottorði vegna andlegs áfalls. Hann hefur verið sjómaður hjá útgerðinni í fleiri ár en hefur lent í röð áfalla síðastliðin ár.
Í fyrra missti hann barnabarn sitt, og þá er hann nátengdur harmleiknum á Blönduósi þar sem hann missti bestu vinkonu sína og horfði upp á æskuvin sinn fluttan milli heims og helju á sjúkrahús.
Eiginkona hans Þórhildur Helga Þorleifsdóttir ræddi málið við Fréttablaðið í gær. Þórhildur segir það fráleitt að líta ekki áfall sem veikindi. „Svo það þurfa að vera standa í svona að þurfa hafa áhyggjur af vinnu og afkomu þegar maður er í djúpri sorg.“
Verkferlum verði breytt
Brim segist harma mál Boga í tilkynningu.
„Brim harmar að verkferlar félagsins hafi brugðist í þessu máli. Mikilvægt er að fyrirtækið sýni starfsfólki og aðstendum þess samúð og skilning við eins erfiðar aðstæður og komu upp í þessu tilviki.“
Þá segist félagið ætla að endurskoða verkferla sína og viðbrögð við erfiðum áföllum starfsfólks, en að öðru leyti muni félagið ekki tjá sig um einstaka starfsmenn.