Gunnlaugur Jónsson, aðstoðarvarðstjóri hjá slökkviliðinu á höfuðborgarsvæðinu segir það hafa skipt sköpum og auðveldað slökkvistarf hversu snör handtök sjúkraflutningamanns sem var meðal fyrstu viðbragðsaðila á vettvang voru við eldsvoðan sem varð í Mávahlíð í nótt.
„Við byrjuðum á því að bjarga fólki út og svo var ráðist á eldinn eftir það og það gekk mjög hratt fyrir sig,“ segir Gunnlaugur í samtali við mbl.is.
Sjúkraflutningamaðurinn hafði þá þegar tæmt úr einu slökkvitæki og náð með því að slökkva mesta eldinn sem logaði í anddyri íbúðarinnar. Reykkafarar voru sendir inn í íbúðina að bjarga fólkinu og komu þeir tveimur aðilum út um glugga en sá þriðji komst út af sjálfsdáðum.
Ekki er vitað um ástand þeirra sem fluttir voru á bráðadeild en íbúðin sem eldurinn kom upp í er mikið skemmd vegna elds, reyks og vatns. Rannsókn á eldsupptökum eru í höndum tæknideildar lögreglunnar á höfuðborgarsvæðinu.