Yfirlit yfir rekstur Seltjarnarnesbæjar hefur nú verið birt á heimasíðu bæjarins. Rekstur bæjarins reyndist vera talsvert undir áætlunum á fyrstu sex mánuðum ársins.
Skatttekjur námu 1.758 milljónum og voru 50 milljónum undir áætlun. Í tilkynningu frá Seltjarnarnesbæ segir að líkt og í fyrra skeri tveir málaflokkar sig úr hvað varðar útgjaldaaukningu; fræðslumál og félagsþjónusta.
Útgjöld til fræðslumála námu 1.097 milljónum, eða 62,4 prósent af skatttekjum. Þessi auknu útgjöld má að mestu rekja til átaks í leikskólamálum þar sem nýr leikskóli, Fagrabrekka, var til að mynda tekinn í notkun.
Útgjöld til félagsþjónustu námu tæpum 326 milljónum, eða 18,5 prósent af skatttekjum. „Eru útgjöld vegna málefna fatlaðra og barnaverndarmál orðin afar íþyngjandi fyrir bæinn,“ segir í tilkynningunni.
Þar kemur einnig fram: „Unnið er að aðgerðum til að ná jafnvægi í fræðslumálum og félagsþjónustunni. Ljóst er að hagræða þarf á einhverjum vígstöðvum og/eða skera niður þjónustu. Rekstur annarra málaflokka er í jafnvægi.“
Staðgreiðsla útsvars hækkaði um 2,3 prósent. „[A]thygli vekur að meðaltalshækkun sveitarfélaga er 6,1% og töluvert meiri í nágrannasveitarfélögunum,“ segir að lokum í tilkynningunni.
Fjárhagsstaðan ekki góð
Í apríl síðastliðnum sagði Guðmundur Ari Sigurjónsson, sem situr í minnihluta bæjarstjórnar fyrir Samfylkinguna, í samtali við Mbl.is að fjárhagsstaða sveitarfélagsins væri ekki góð. Ofan á halla í rekstri hafi skuldir sveitarfélagsins verið auknar um 2,5 milljarða króna.
„Það eru allar tölur rauðar í bókhaldinu. Það þarf að leggjast yfir þetta og búa til ný plön um hvernig við þurfum að vinna okkur út úr þessari stöðu. Þetta er ný staða fyrir Seltjarnarnesbæ sem hefur gefið sig út fyrir að vera með reksturinn réttu megin við núllið,” sagði Guðmundur.
Hann sagði stöðuna grafalvarlega og kvaðst hafa miklar áhyggjur af því í hvaða aðgerðir þyrfti að fara. „Við í Samfylkingunni munum reyna að verja þá þjónustu sem við veitum. Við þurfum að ræða skattahækkanir eða niðurskurð. Þetta getur orðið strembið.”
Þá benti Guðmundur á að inni í A hluta rekstraryfirlitsins væru 252 milljónir króna sem áætlað hafði verið að færu í viðhaldsframkvæmdir á byggingum í eigu bæjarins en ekki hefði verið farið í. „Það er verið að mýkja skekkjuna með því að framkvæma ekki það sem var búið að samþykkja að gera. Þá birtist það sem hagnaður í bókhaldinu.“