Icelandair hefur uppfært flugáætlun sína til ársloka og gerir samkvæmt henni ekki ráð fyrir Boeing 737-MAX vélum í rekstri fyrir þann tíma. Flugfélagið hefur því aðlagað flugáætlun sína í samræmi við það og aðra þróun á markaði. Þetta kemur fram í tilkynningu Icelandair Group til Kauphallarinnar.
Sem kunnugt er kyrrsetti Icelandair allar Boeing 737-MAX 8 flugvélar fyrirtækisins þann 12. mars síðastliðinn í kjölfar þess að tvær flugvélar af sömu gerð hröpuðu með nokkurra mánaða millibili. Fórst vél Lion Air frá Indónesíu í október á síðasta ári og vél Ethiopian Airlines þann 10. mars á þessu ári.
Á dögunum sagðist Bogi Nils Bogason, forstjóri Icelandair Group, búast við því að MAX-vélar flugfélagsins kæmust aftur í gagnið í október. Höfðu tilkynningar frá fyrirtækinu sömuleiðis miðast við það.
Kjarninn greinir frá því að Icelandair Group hafi tapað alls 89,4 milljónum dala, um ellefu milljörðum króna, á fyrstu sex mánuðum þessa árs. Heildartekjur jukust þó á sama tíma, launakostnaður lækkaði en eldsneytiskostnaður og kostnaður vegna flugvélaleigu hækkaði.
Ástæðan fyrir þessu slaka uppgjöri er fyrst og fremst sögð vera kyrrsetningar á MAX-vélum Icelandair. Flugfélagið hefur þegar fengið sex slíkar vélar afhentar og átti von á þremur til viðbótar. Stefnt hafði verið að því að MAX-vélarnar myndu samsvara 27 prósent af sætaframboði félagsins á árinu 2019.
Icelandair hyggst krefjast 17 milljarða króna í skaðabætur frá Boeing vegna kyrrsetningar á MAX-vélum flugfélagsins.