Forsætisnefnd Alþingis féllst fyrr í dag á mat siðanefndar Alþingis að Bergþór Ólafsson og Gunnar Bragi Sveinsson, þingmenn Miðflokksins, hefðu brotið siðareglur með ummælum sínum á klaustri þann 20. nóvember.
Þá telur siðanefnd að þingmennirnir Anna Kolbrún Árnadóttir, Karl Gauti Hjaltason, Ólafur Ísleifsson og Sigmundur Davíð Gunnlaugsson hefðu ekki gerst brotleg við siðareglur.
Þingmennirnir sjálfir hafa gagnrýnt harðlega vinnubrögð og niðurstöðu siðanefndar í bréfum sem Morgunblaðið birti í morgun á vef sínum.
Í niðurstöðu siðanefndar sagði: „Eins og áður greinir getur hátterni sem telst ósiðlegt eða óviðeigandi af hálfu þingsins kastað rýrð á Alþingi og skaðað ímynd þess. Þar undir getur fallið ósæmileg framkoma eða vanvirðing er lýtur að kynferði, kynþætti eða trúarbrögðum. Siðanefnd telur ekki þörf á að greina hvert og eitt atriði í ummælum [Bergþórs og Gunnars]. Þau eru öll af sömu rótinni sprottin. Þau eru ósæmileg og í þeim felst vanvirðing er lýtur að kynferði þeirra kvenna sem um er rætt. Siðanefnd telur þau einnig til þess fallin að kasta rýrð á Alþingi og skaða ímynd þess, auk þess sem þau sýna Alþingi, stöðu þess og störfum ekki virðingu.“