Róbert Marshall, upplýsingafulltrúi ríkisstjórnarinnar, segir að hann verði líklega ekki starfsmaður mánaðarins í stjórnarráðinu í júní. Róbert segir frá þessu á Facebook-síðu sinni en tilefnið er uppnám sem varð í breska morgunþættinum This Morning Live á ITV-sjónvarpsstöðinni í morgun.
Vísir fjallaði um málið í kvöld en svo virðist sem misskilningur vegna tímamismunar hafi gert það að verkum að Katrín var ekki til viðtals á tilsettum tíma. Virðist það hreinlega hafa gleymst hér á landi að klukkan í Bretlandi er einum klukkutíma á undan klukkunni hér heima.
Í frétt Vísis er bent á að Phillip Schofield, einn af stjórnendum þáttarins, hafi gert góðlátlegt grín af þessu enda ekki stórmál í sjálfu sér. Var annar gestur fenginn til að mæta aðeins fyrr.
Svo virðist vera sem Róbert Marshall beri ábyrgðina á þessu enda segir hann á Facebook-síðu sinni: „Ég verð líklega ekki starfsmaður mánaðarins í stjórnarráðinu í júní. Margir myndu halda að ég hefði lært að reikna með tímamismun. En nei ...“
Einhverjir muna eflaust eftir því þegar Róbert Marshall sagði starfi sínu lausu sem fréttamaður Stöðvar 2 árið 2005. Málið snerist um það hvenær bandarísk stjórnvöld höfðu vitað af stuðningi Íslendinga vegna stríðsrekstursins í Írak. Hélt Róbert því fram að stuðningurinn hefði legið fyrir áður en ákveðinn ríkisstjórnarfundur hófst þann 18. mars árið 2003, en staðreyndin var sú að hann lá fyrir eftir umræddan ríkisstjórnarfund.
Í harðorðri yfirlýsingu sem Halldór Ásgrímsson, þáverandi forsætisræðaherra, sendi frá sér á sínum tíma sagði hann: „Frétt CNN er birt kl. 23:29 þann 18. mars á austurstrandartíma í Bandaríkjunum en þá var klukkan 04:29 að morgni 19. mars hér á landi og liðinn meira en hálfur sólarhringur frá því ríkisstjórnarfundi lauk.“