Mikil umræða var eftir síðustu áramót um mikla mengun af völdum flugelda. Metsala var í flugeldasölu og stillt veður sem gerði það að verkum að mengunin mældist mikil. Heilbrigðisfulltrúi hjá Heilbrigðiseftirliti Reykjavíkur sagði mengunina hafa farið fram úr svörtustu spám.
Ýmsir sögðust í framhaldinu ekki ætla að kaupa flugelda og styrkja frekar björgunarsveitirnar með peningarframlagi eða lögðu til að almenn notkun þeirra yrði bönnuð.
„Málmríkt, kolefnisríkt, brennisteinsríkt og klórríkt“ loft
Í skýrslu um svifryk um áramót sem Efnagreiningar hjá Nýsköpunarmiðstöð Íslands gerði, og birt var í vor, var gerð athugun á svifryksgildum dagana 29. desember 2017 til 2. janúar 2018. Í niðurstöðum hennar segir að veruleg aukning hafi verið á hlutfalli ýmissa málma í svifryki á Norðurhellu í Hafnarfirði um áramótin miðað við dagana á undan og eftir. Mælar annars staðar til dæmis í Reykjavík, sýni svipaða mynd málmamengunar, nema hvað styrkirnir nær hjarta borgarinnar hafi mælst hærri í takt við hærri svifryksstyrk.
