Icelandair hótel ákváðu að draga laun af öllum þeim starfsmönnum sem vinna störf sem féllu undir verkfallsaðgerðir Eflingar og VR í mars. Ákvörðunin var tekin óháð því hvort viðkomandi starfsmenn hefðu verið á vakt á þeim dögum sem verkfallsaðgerðirnar fóru fram. Framkvæmdastjóri Eflingar segir þetta algjöra svívirðu.
„Við fengum strax fólk til okkar í síðustu viku og við vorum í smástund að átta okkur á því að þetta væri ekki bara einhver einstaklingsbundin tilvik, heldur að fyrirtækið hefði tekið þessa stefnu gagnvart öllum starfsmönnum,“ segir Viðar Þorsteinsson framkvæmdastjóri Eflingar í samtali við mbl.is.
Tveggja daga laun voru dregin af starfsmönnum vegna verkfallsaðgerðanna 8. mars og 22. mars, óháð því hvort þeir voru á vakt eður ei. Viðar segir að þetta sé „algjör svívirða“ að mati stéttarfélagsins.
Hann veit ekki til þess að fleiri atvinnurekendur hafi haft þennan háttinn á. „Þetta er eina tilvikið sem ég veit um, þar sem að fyrirtæki hefur gert þetta sem einhverja vísvitandi stefnu. Þetta er að okkar mati til háborinnar skammar og fólk hefur komið hérna til okkar, starfsmenn, í öngum sínum.“
Icelandair hótel telja aðgerðina lögum samkvæmt
Í samtali við RÚV segir Magnea Þórey Hjálmarsdóttir, framkvæmdastjóri Icelandair hótela, að búið hafi verið að staðfesta að félagsmenn stéttarfélaganna tveggja gætu sótt launagreiðslu fyrir dagana tvo í verkfallssjóði félaganna. Hún segir að fyrirtækið telji þennan frádrátt vera lögum samkvæmt.
Viðar gefur lítið fyrir þessar skýringar Icelandair hótela. „Það er bara ótrúlegt, því að við höfum aldrei gefið það til kynna að við ætluðum að greiða fólki verkfallsstyrk sem að fór ekki í verkfall. Hvers vegna í ósköpunum ættum við að gera það? Mér þykja þetta ótrúverðugar eftiráskýringar fyrirtækisins,“ segir hann og ítrekar að það sé til háborinnar skammar að einn stærsti atvinnurekandinn í hótelgeiranum viðhafi slík vinnubrögð.
Hóta að fara með málið fyrir dóm
Efling sendi frá sér yfirlýsingu vegna málsins, þar sem skorað er á hótelkeðjuna að leiðrétta þennan frádrátt tafarlaust. Ef ekki verður orðið við kröfu Eflingar um að Icelandair hótel greiði starfsmönnum sem ekki voru á vakt laun, hyggst stéttarfélagið fara með málið fyrir dóm.
Yfirlýsing Eflingar í heild sinni:
„Efling - stéttarfélag fordæmir harðlega þá ákvörðun IcelandAir Hotels að draga laun af starfsmönnum vegna verkfalla sem þeir tóku ekki þátt í. Efling skorar jafnframt á hótelkeðjuna að leiðrétta mistökin tafarlaust. Hótelkeðjunni ber að bæta starfsmönnum upp launamissi ásamt með dráttarvöxtum og veita þeim jafnframt afsökunarbeiðni.
Efling hafnar alfarið tilraunum hótelkeðjunnar til að skjóta sér undan ábyrgð á málinu. Fulltrúi keðjunnar hefur hermt upp á starfsmenn að þeir hafi sagst eiga rétt á greiðslum úr vinnudeilusjóði þótt þeir hafi ekki verið við störf. Slíkt á sér enga stoð í veruleikanum. Efling gaf út ítarlegar skriflegar leiðbeiningar um rétt á greiðslum úr vinnudeilusjóðum og þar kemur slíkt hvergi fram. Skýringar hótelsins standast því enga skoðun og eru yfirklór.
Viðar Þorsteinsson, framkvæmdastjóri Eflingar segir þetta svívirðilega framkomu. „Það er verið að hafa laun upp á 12-25 þúsund krónur af fólki sem er á lægstu laununum. Það er hreint með ólíkindum að hótelkeðjan skuli grípa til þessara ráðstafana og við munum bregðast við af fullri hörku.“
Efling mun gera kröfu á IcelandAir Hotels að greiða starfsmönnunum sem ekki voru á vakt laun, ef ekki verður orðið við henni verður farið með málið fyrir dóm.“