Tíu alþingismenn fá níu af hverjum tíu krónum sem Alþingi endurgreiðir vegna aksturs þingmanna um landið, en undanfarna daga hafa himninháar akstursgreiðslur þingsins til Ásmundar Friðrikssonar, annars þingmanns sjálfstæðismanna í Suðurkjördæmi vakið mikla athygli.
Það er vefmiðilinn Kjarninn sem skoðaði endurgreiðslurnar sérstaklega og birtir í dag listann yfir þá sem fá mestu endurgreiðsluna úr opinberum sjóðum landsmanna, en þær eru undanþegnar skatti og teljast til útlags kostnaðar.
Þingmennirnir tíu sem fengu hæstu endurgreiðslur vegna aksturs fengu samtals 25,8 milljónir króna greiddar frá ríkinu í fyrra. Samtals voru greiddar 29,2 milljónir króna vegna ársins í heild. Það þýðir að tíu efstu fengu 88 prósent af öllum endurgreiðslum.
Sá sem fékk hæstu endurgreiðsluna, Ásmundur Friðriksson þingmaður Sjálfstæðisflokks, fékk 4,6 milljónir króna endurgreiddar. Endurgreiddur kostnaður Ásmundar er því tæplega 16 prósent af öllum endurgreiddum kostnaði. Ásmundur er 1,6 prósent þingmanna. Kjarninn vekur athygli á því að akstur Ásmundar á síðasta ári jafngildir því að hann hafi ekið stanslaust í 85 vinnudaga, á kostnað landsmanna..
Þeir fjórir þingmenn sem fá hæstu endurgreiðslurnar þiggja samtals 14 milljónir króna árlega vegna þeirra. Það þýðir að þeir fá tæplega helming allra endurgreiðslna vegna aksturs.
Endurgreiðslur til þingmanna vegna aksturs hafa dregist mikið saman undanfarin ár eftir að þeim tilmælum var beint til landsbyggðarþingmanna að nota frekar bílaleigubíla og flugleiðir til að komast á milli staða. Skrifstofa Alþingis hefur gert samninga við bílaleigufyrirtæki sem eru að finna í rammasamningi Ríkiskaupa, um afslætti af gjaldskrá bílaleigubíla til að ná niður þessum kostnaði enn frekar, segir í frétt Kjarnans.
