Katrín Jakobsdóttir var gestur í Silfrinu fyrr í dag og ræddi þar komu Mike Pence, varaforseta Bandaríkjanna en hann kemur til landsins á miðvikudag. Katrín verður erlendis á þeim tíma á ársfundi norrænu verkalýðshreyfingarinnar. Hefur verið gagnrýnt að hún hafi ákveðið að fara úr landi.
Þá sagði Katrín að hún væri ófeimin við að ræða við varaforsetann og kvaðst furða sig á umræðunni um að sumir teldu hinn merkilega fund norrænu verkalýðshreyfingarinnar ómerkilegan.
„Það að hlusta á hvernig um þetta er talað finnst mér eiginlega alveg stórmerkilegt. Meira að segja fólk á öllu litrófi stjórnmálanna telur að þetta sé eins og að heimsækja eitthvað landsþing frímerkjasafnara og þá spyr ég hvar þetta fólk sé statt í lifinu.“
Ekki er víst að Katrín nái að hitta Pence en unnið er að því að koma því í kring. Sagði Katrín að hún væri ósammála varaforsetanum í mörgum grundvallaratriðum.