\"Ég brjálast yfir skemmdarverkunum sem eru framkvæmd í skjóli nætur í menntamálaráðuneytinu. Óþolandi hversu lítið er fjallað um þetta. Illugi virðist því miður vera mesta skaðræðið í ríkisstjórninni,\" segir Helga Vala Helgadóttir lögmaður um lækkun námslána hjá námsfólki sem þarf að sækja sér menntun utan landsteinanna.
Um Illuga segir Helga Vala á facebook að hann hafi stytt framhaldsskólann í þrjú ár i stað þess að skoða hvort ekki væri frekar tilefni til að stytta grunnskólann. \"Innleiddi nýtt einkunnakerfi í grunnskóla sem enginn skilur, skar niður alla kennslu fyrir stúdentsnemendur eldri en 25 ára (öldungadeild þar á meðal) og Rúv... Eigum við að ræða Rúv? Nú þetta, skera niður námslán til nemenda á erlendri grundu. Hvað gengur manninum til á þeim tímum sem allt á að vera í blússandi velmegun.\"
Fleiri hafa gagnrýnt áherslur Illuga Gunnarssonar um stórvægilegar breytingar á LÍN. Rúnar Helgi Vignisson, dósent við HÍ, spyr: \"Er þetta skynsamlegt ráðslag af hálfu smáþjóðar sem er staðsett úti í miðju Atlantshafi? Þykjumst við þá ekki þurfa að fara utan lengur til að afla okkur menntunar? Lán til framfærslu íslenskra námsmanna erlendis munu lækka um allt að 20% á næsta skólaári samkvæmt nýjum úthlutunarreglum Lánasjóðs íslenskra námsmanna, LÍN, sem tóku gildi 1. apríl. Formaður SÍNE, Sambands íslenskra námsmanna erlendis, segir í samtali við Morgunblaðið í dag niðurskurð hjá LÍN allt of lengi hafa bitnað á nemum sem sæki háskólanám erlendis.\"
