Icelandair hefur verið valið besta flugfélag Evrópu af Airline Passengers Experience Association (APEX). Verðlaunin voru afhent við hátíðlega athöfn í Dublin á Írlandi í gær. Frá þessu er greint í Markaðnum.
Icelandair hlaut sömuleiðis verðlaun fyrir besta afþreyingarkerfið á meðal evrópskra flugfélaga og bestu nettenginguna um borð, og vann því til alls þrennra verðlauna. Flugfélagið vann einnig verðlaunin fyrir besta afþreyingarkerfið á síðasta ári.
„Það er okkur hjartans mál að tryggja farþegum okkar góða upplifun um borð í vélum Icelandair. Icelandair hefur um árabil lagt sig fram við að auka þjónustu, valmöguleika fyrir alla aldurshópa í afþreyingu sem og önnur þægindi. Þessi verðlaun eru til marks um þann árangur sem Icelandair og starfsmenn félagsins hafa náð á því sviði og á því munum við byggja enn frekar,“ segir Birna Ósk Einarsdóttir, framkvæmdastjóri sölu- og þjónustusviðs Icelandair, í fréttatilkynningu frá Icelandair.
APEX farþegaverðlaunin eru veitt á hverju ári og meta reynslu og upplifun farþega af flugfélögum. Um 500 flugfélög víðs vegar um heiminn taka þátt í könnun sem byggir á um milljón flugferðum.
Í könnuninni gefa farþegar flugfélögum einkunn sem byggir á heildarupplifun. Þeir geta svo í framhaldinu veitt einkunn fyrir ýmsa þætti sem taka til þjónustu og upplifun um borð, t.d. þægindum, þjónustu, veitingum, afþreyingarkerfum, nettengingu og öðru.
