Höskuldur H. Ólafsson, fyrrverandi bankastjóri Arion banka, fékk 150 milljónir króna við starfslok sín hjá bankanum í lok apríl. Þetta kemur fram í reikningsskilum bankans fyrir annan ársfjórðung ársins 2019. Mbl.is greinir frá.
Í fyrra var Höskuldur hæst launaði bankastjórinn með 67,5 milljónir króna í árslaun, auk 7,2 milljóna króna í árangurstengdar greiðslur, samtals 74,7 milljónir króna. Mánaðarlaun hans á árinu 2018 voru því rúmlega 5,6 milljónir króna, og rúmlega 6,2 milljónir króna á mánuði ef árangurstengdu greiðslurnar eru teknar með.
Í umfjöllun Mbl.is segir að Höskuldur hafi starfað sem bankastjóri Arion banka í samtals 107 mánuði. 150 milljóna starfslokagreiðslan samsvarar því 1,4 milljónum króna fyrir hvern mánuð sem hann gegndi stöðunni.
Þegar Höskuldur lét af störfum tók Stefán Pétursson, framkvæmdastjóri fjármálasviðs Arion banka, tímabundið við stöðu bankastjóra þann 1. maí. Benedikt Gíslason var svo ráðinn nýr bankastjóri Arion banka og hóf störf 1. júlí.