Íslensk erfðagreining býður almenningi á fræðslufund um erfðavísindi og lyf á morgun. Í tilkynningu frá ÍE segir að erfðafræðin hafi fært okkur verkfæri til að greina erfðabreytileika sem hafa áhrif á þætti í starfsemi frumna og líffæra sem hugsanlega er hægt að hafa áhrif á með lyfjum. Þekking úr erfðafræðirannsóknum nýtist nú þegar til að þróa ný og virkari lyf og á grundvelli uppgötvana ÍE er til dæmis unnið að þróun lyfja við Alzheimerssjúkdómnum.
Á fundinum, sem fer fram í húsakynnum Íslenskrar erfðagreiningar frá klukkan 13:00 til 14:30 laugardaginn 16. mars, munu fjórir aðilar halda tölu. Þetta eru þau Jón Snædal öldrunarlæknir, Hilma Hólm hjartalæknir, Hans Tómas Björnsson barnalæknir og Kári Stefánsson, forstjóri ÍE.
Þess má geta að Hilma verður gestur Lindu Blöndal í frétta- og umræðuþættinum 21 á Hringbraut á mánudagskvöldið 18. mars.
Jón Snædal mun fjalla um það hvernig erfðaupplýsingar gera okkur kleift að gera rannsóknir á nýjum lyfjum sem varla væru mögulegar annars. Erfðafræðin hefur ekki bara aukið möguleika okkar við að þróa ný lyf heldur felast í henni margvísleg sóknarfæri í betri heilbrigðisþjónustu. Erfðaupplýsingar gera læknum kleift að veita sjúklingum meðferð sem er sérsniðin að hverjum og einum, til dæmis með markvissari lyfjagjöf.
Hilma Hólm mun fjalla um hvað erfðafræðin hefur kennt okkur um tengsl kólesteróls og kransæðasjúkdóms. Meðal annars ræðir hún af hverju lyf sem minnka vonda kólesterólið hafa áhrif á kransæðasjúkdóm en lyf sem auka góða kólesterólið gera það ekki og hvort erfðafræðin geti leiðbeint okkur um mataræði.
Hans Tómas Björnsson ræðir um Kabuki heilkenni, sjaldgæfan erfðasjúkdóm sem uppgötvaðist í gegnum háafkastaraðgreiningu fyrir 7 árum síðan en nú hefur hópur á hans vegum þróað mögulega meðferð. Hann mun einnig rekja fleiri dæmi um sjúkdóma þar sem greining einstaklinga í gegnum háafkastaraðgreiningu leiddi samstundis til meðferðarmöguleika sem annars hefðu ekki verið í boði.
Kári Stefánsson ræðir hvernig má nota erfðir sjúkdóma til að meta líkur á svari við meðferð.
Þeim sem ekki komast á fundinn er bent á að hann verður í beinni útsendingu á Facebook síðu Íslenskrar erfðagreiningar.
