Veðurspáin fyrir vikuna lítur ekki vel út fyrir íbúa höfuðborgarsvæðisins, en spáð er rigningu alla vikuna. Borgarbúar hafa notið sólarinnar undanfarnar vikur, en sáralítil úrkoma hefur verið undanfarnar tvær vikur á höfuðborgarsvæðinu. Sól verður á austanverðu landinu þar til á fimmtudag, en þá byrjar að rigna. Veðurhorfur á landinu næstu daga má sjá hér að neðan.
Á þriðjudag og miðvikudag: Vestan 8-15 m/s, en hægari vindur austast á landinu. Dálítil væta af og til vestantil á landinu, en léttskýjað á austur helmingi landsins. Hiti 8 til 22 stig, svalast vestast en hlýjast á Suðausturlandi.
Á fimmtudag: Suðvestan 5-10 m/s og dálítil rigning, en áfram þurrt og bjart austantil á landinu. Hiti 10 til 21 stig, hlýjast austantil.
Á föstudag: Sunnan 5-10 og víða rigning, en úrkomulítið norðaustantil. Hiti 10 til 16 stig.
Á laugardag: Útlit fyrir austlæga átt og dálitla vætu um land allt. Hiti 11 til 16 stig.
Á sunnudag: Líkur á norðlægri átt og rigningu norðantil en skúrum syðra. Kólnar í veðri.