Brynjar Níelsson gagnrýnir harðlega bréf frá Líf án ofbeldis. Hann segir bréfið aðför að réttarríkinu. Talsmaður Lífs án ofbeldi sagði í samtali við Fréttablaðið að hreyfingin hefði verið stofnuð vegna síendurtekinna úrskurða í umgengismálum. Þá kom einnig fram að börn væru skikkuð í umgengni við gerendur; barnaníðinga og ofbeldismenn. Mbl.is vakti athygli á málinu.
Brynjar Níelsson sagði á þingi: „Ég ætla að gera hér að umtalsefni bréf sem ég fékk, og reikna með að aðrir þingmenn hafi fengið líka, frá félagsskap sem heitir Líf án ofbeldis.“
Brynjar bætti við: „Miðað við innihald bréfsins er félagsskapurinn samansettur af mæðrum eingöngu sem gera þær kröfur að þingmenn bregðist við því sem þeir sem fara með úrskurðarvald í forsjár- og umgengnismálum, þ.e. sýslumenn og dómstólar, gera. Félagsskapurinn vill að við skiptum okkur af því og breytum einhvern veginn umhverfinu vegna þess að niðurstaðan hentar ekki.“
Jafnframt varaði Brynjar þingmenn við að taka mark á bréfinu og um væri að ræða aðför að þeim sem beri að úrskurða um ágreining og að krafa væri sett fram um að annar aðilinn hefði sjálfdæmi um hvernig niðurstaða í málum yrði. Brynjar sagði:
„Ég mun ekki taka þátt í slíku og ég vona að öðrum þingmönnum detti það ekki í hug. Fólk er hér í þeirri baráttu að það gerir kröfu um að við víkjum til hliðar reglum réttarríkisins sem við erum búin að strögla við að koma á árum, áratugum og jafnvel öldum saman. Ég bið þingmenn að íhuga þetta.“