„Fyrsti skammturinn af bóluefni gegn Covid-19 er kominn til landsins. Það var ósvikin gleðistund að fylgjast með Svandísi Svavarsdóttur heilbrigðisráðherra og þríeykinu taka á móti því í morgun.“
Þetta segir Guðni Th. Jóhannesson, forseti Íslands, á Facebook-síðu sinni.
Fyrstu tíu þúsund skammtarnir af bóluefni Pfizer gegn COVID-19 komu til landsins í morgun og var bóluefnið afhent formlega skömmu síðar í höfuðstöðvum Distica í Garðabæ. Við afhendinguna voru viðstödd Svandís Svavarsdóttir heilbrigðisráðherra, Ásta Valdimarsdóttir ráðuneytisstjóri, Alma Möller, landlæknir, Þórólfur Guðnason, sóttvarnalæknir og Víðir Reynisson yfirlögregluþjónn.
Svandís sagði að dagurinn í dag væri dagur góðra frétta og óskaði hún landsmönnum til hamingju. „Mikið sem ég vildi að við gætum séð brosin bak við grímurnar en ég get fullvissað ykkur öll um að það eru víða bros á andlitum á Íslandi í dag.“
Guðni tekur undir þetta en hann minnir á að enn er nokkuð í land þar til sigur vinnst í baráttunni gegn veirunni skæðu. „Bólusetningin sjálf verður langhlaup en ekki kapphlaup, sýnum þolinmæði og gætum enn sóttvarna, en leyfum okkur um leið að horfa bjartsýn fram á við.“