Það er ekki nóg með að fjöldi Íslendinga sjái heiminn og eigin tilvist í nýju ljósi eftir blóðmánann í nótt heldur hefur Bandaríska geimferðastofnunin NASA boðað til fréttamannafundar síðdegis í dag og heitir stórtíðindum.
Grunur leikur á að stofnunin muni afhjúpa gögn sem bendi til að rennandi vatn sé að finna á Mars. Ef fljótandi vatn finnst á plánetunni eykur það mjög líkurnar á sjálfbærni lífs úti í geimnum. Áður hafa fundist sannanir fyrir að vatn hafi í eina tíð verið að finna á rauðu plánetunni eins og Mars er gjarnan kölluð.
Ekkert hefur enn lekið út um efni fréttamannafundarins en Guardian tengir fundinn við rennandi vatn.
