PreCold úðinn sem er vinsælasta kvefmeðal Svía er alíslenskur að uppruna og unninn úr fisk-ensímum sem lama og eyða kvefveirunni. Líftæknifyrirtækið Zymetech hlaut í dag Nýsköpunarverðlaun Íslands fyrir úðann.
Zymetech hefur þróað efnablöndu sem notar ensím úr þorskinnyflum til að drepa kvefveirur. Aðstæður höguðu því þannig að varan var fyrst kynnt í Svíþjóð þar sem óhætt er að segja að hún hafi slegið í gegn. PreCold er nú mest selda kvefmeðalið í Svíþjóð. Rannsóknir sýna að úðinn geti komið í veg fyrir að fólk fái kvef, og að þeir sem þegar eru með kvef geta kvatt það á þremur dögum í stað viku.
Nýsköpunarverðlaun Íslands eru veitt af Rannís, Íslandsstofu, Nýsköpunarmiðstöð og Nýsköpunarsjóði til fyrirtækja sem þykja hafa skarað fram úr í þróun nýrrar vöru eða þjónustu, sem byggð er á rannsóknar- og vísindastarfi og náð hefur árangri á markaði. Tilgangur verðlaunanna, sem voru fyrst veitt árið 1994, er að vekja athygli á þeim mikilvægu tengslum sem eru á milli rannsókna og þekkingaröflunar og aukinnar verðmætasköpunar í atvinnulífinu