Hjúkrunarráð Landspítala skorar á heilbrigðisyfirvöld að bæta starfsumhverfi hjúkrunarfræðinga. Hjúkrunarráð sendi heilbrigðisráðuneyti áskorunina í gær. Mbl.is greinir frá.
Í áskoruninni kemur fram: „Hjúkrunarráð Landspítala skorar á heilbrigðisráðuneyti að bregðast strax við þeim fjölmörgu ábendingum sem hafa verið sendar, t.d. frá embætti landlæknis, Félagi íslenska hjúkrunarfræðinga, framkvæmdastjórn Landspítala og hjúkrunarráði Landspítala, og nýta þær til þess að bæta starfsumhverfi hjúkrunarfræðinga. Jákvætt starfsumhverfi er einn af þeim lykilþáttum sem gera starfsfólki kleift að upplifa starfsánægju.“
Í áskoruninni er bent á að fjöldi fólks á bráðamótttöku bíði eftir innlögn á Landspítala og að við núverandi ástand sé hvorki mögulegt að tryggja öryggi sjúklinga né starfsfólks. Skorturinn á hjúkrunarfræðingum sé alvarlegur og hafi neikvæð áhrif víða, m.a. standi um 40 sjúkrarými auð á spítalanum vegna manneklu hjúkrunarfræðinga.
Bent er á þann gríðarlega mannauð sem felist í hjúkrunarfræðingum á Landspítalanum og því til stuðnings sé úttekt embættis landlæknis, þar sem tekið er fram að þrátt fyrir mikið álag fari enn fram öflugt gæðastarf á spítalanum. Álagið á hjúkrunarfræðinga á spítalanum sé mikið og ljóst að þeir séu verulega útsettir fyrir alvarlegri streitu í starfi. Hjúkrunarfræðingar geri kröfu um að starfa í öruggu og heilsueflandi starfsumhverfi þar sem mögulegt sé að tryggja sjúklingum örugga, faglega og framúrskarandi þjónustu.