Fimm manna fjölskylda sem vísað var frá landi í nótt segir hópinn hafa verið skilinn eftir við flugstöðina við komuna til Grikklands í morgun og að ástandið þar sé slæmt.
Kjarninn greinir frá.
Yismen Hussein, ung kona úr fjölskyldunni, segir í samtali við blaðamann Kjarnans að nóttin hafi verið versta nótt lífs síns en líkt og greint hefur verið frá var íraska fjölskyldan handtekin í gær og þeim fylgt úr landi í skjóli nætur með leiguflugvél frá Keflavíkurflugvelli.
Að sögn Yismen er fjölskyldan peningalaus og allslaus á götunni í Grikklandi. „Þeir skildu okkur eftir og fóru,“ segir Yismen í samtali við Kjarnann og heldur áfram: „Gerið það, hjálpið okkur, gerið það. Dauði er betri fyrir mig en að dvelja hér. Litla systir mín reyndi að svipta sig lífi því hún er svo örvingluð.“
Fjölskyldan viti ekki hvað bíður þeirra á morgun en að vinir á Íslandi hafi komið til aðstoðar svo þau hefðu þak yfir höfuðið í nótt á hóteli.
Fréttablaðið greindi frá því í gær að systur hefðu verið handteknar á leið heim úr skólanum en þær stunduðu nám í Fjölbrautaskólanum við Ármúla. „Þegar ég og systir mín komum heim úr skólanum í gær þá beið lögreglan eftir okkur,“ segir Yismen við Kjarnann.
Nánari umfjöllun um málið má nálgast á vef Fréttablaðsins.
