VR, Efling og Verkalýðsfélag Akraness (VLFA) hafa tekið ákvörðun um að fara fram saman í kjaraviðræðum við atvinnurekendur. Munu þau í sameiningu vísa kjaradeilu sinni við Samtök atvinnulífsins til ríkissáttasemjara og býst Vilhjálmur Birgisson, formaður VLFA, við því að það gerist í dag. Frá þessu er greint á Mbl.is.
Ákvörðunin um samstarf var tekin í kjölfar þess að Efling og VLFA ákváðu að afturkalla samningsumboð sitt frá Starfsgreinasambandinu (SGS). Afturköllunin á samningsumboðinu kom í kjölfar formannafundar SGS í síðustu viku, þar sem meirihluti lagðist gegn því að vísa kjaradeilunni til ríkissáttasemjara.
Í annarri frétt Mbl.is um málið segist Vilhjálmur búast við því að fleiri félög innan SGS gangi inn í þetta samstarf, þó hann gæti ekki gefið upp hvaða félög væri um að ræða. Í gær hafi verið rætt við formenn eða varaformenn allflestra félaga innan SGS og sögðu þeir flestir að samningsumboð þeirra stéttarfélaga yrði áfram hjá sambandinu.
Þá kemur fram að ólíklegt sé að eitthvað gerist í þessum efnum yfir hátíðarnar þar sem ýmis félög innan SGS séu að skoða stöðuna. Þau telji rétt að gefa viðræðunum sem nú eru í gangi við atvinnurekendur tíma að minnsta kosti fram í janúar. Skili þær ekki árangri þurfi að taka stöðuna og meta hvort vísa eigi kjaradeilunni til ríkissáttasemjara líkt og VR, Efling og VLFA hyggist gera núna.
