Íslenskir viðskiptabankar sköpuðu mun meira af peningum en hagkerfið þurfti á að halda í aðdraganda bankahrunsins, segir í skýrslu Frosta Sigurjónsson alþingismanns um endurbætur á peningakerfinu sem hann skilaði forsætisráðherra í dag. Frosti segir að Seðlabankanum hafi ekki tekist að hafa hemil á peningamynduninni á upphafsárum nýrrar aldar með hefðbundnum stjórntækjum sínum.
Skýrsta Frosta, sem unnin er að beiðni forsætisráðherra, rýnir í völd viðskiptabankanna yfir hagkerfi Íslands og hvað heimildir þeirra til að "búa til peninga" hafi kostað þjóðarbúið mikið. Í gegnum tíðina hafi hagkerfi landsins þurft að glíma við þráláta verðbólgu og óstöðugan gjaldmiðil fyrir utan eitt dýrasta bankahrun sem sögur fari af.
Frosti leiðir hugann að því í skýrslunni hvort svokallað þjóðpeningakerfi gagnist Íslandi sem þýði að Seðlabankinn einn hefði vald til að búa til peninga fyrir hagkerfið. Með þjóðpeningakerfi væri dregið úr óstöðugleika peningakerfisins, skuldsetning myndi minnka og tekjur af peningamyndun rynni til ríkisins í stað þess að renna til viðskiptabankanna.
Frosti segir: "Ísland er fullvalda ríki með eigin gjaldmiðil og hefur því frelsi til að segja skilið við hið óstöðuga brotaforðakerfi og innleiða betra peningakerfi."
