Sá orðsnjalli rithöfundur og pistlahöfundur, Guðmundur S. Brynjólfsson er ekki par hrifinn af umræðunni um nýtt vinnumarkaðslíkan og segir að ekki sé hægt að heimfæra skandinavísk módel upp á verðtryggða eyjuna úti í Ballarhafi.
\"Sjaldan eða aldrei hefur verð dælt yfir mig öðrum eins þvættingi,\" skrifar hann beittur og bætir við: \"Vinnumarkaðslíkan – nú þarf ekki að takast á úti á blóðvelli stéttabaráttunnar um kaup og kjör. Menn ákveða það allt saman „fyrir sig fram“, eins og amma sagði.\"
Hann segir meininguna ágæta en viðmiðið vera skakkt: \"Danskar, sænskar og norskar fyrirmyndir gilda ekki hérlendis á meðan önnur gildi úr þeim góðu löndum eru hunsuð. Húsnæðismál, lánamál, verðlagsmál – svo eitthvað sé nefnt. Á meðan lífskjaramál á breiðum grunni eru ekki sambærileg draga menn ekki upp líkön og stilla upp í íslensku misrétti; látandi eins og að á jólaföstunni árið 2013 hafi hér allt verið í orden og meiri jöfnuði hafi aldrei verið náð – og að frá og með þeim helga viðmiðunarpunkti eigi allar starfsstéttir að vera, á sama stað hver gagnvart annarri, allt til enda veraldar. Amen.\"
Hann kann ekki alveg að meta þetta töfraorð, vinnumarkaðslíkan: \"Nú verða ekki framar átök, ekki víxlverkanir verðlags og launa, ekki launaskrið, ekki uppspennt vöffluát í flassljósum fjölmiðla. Nú verður lífsbaráttan eitt eilífðarinnar snúsnú í gleði og sátt – en þó stundaður, meðfram, stöðugur stórfiskaleikur með niðurnjörfaðri hlutverkaskipan. Aðeins eitt er víst; bannfæring höfrungahlaupsins hefur tekið gildi,\" skrifar Guðmundur með upphrópunarmerki.
