Ekki er útilokað að í næstu kosningum verði aðeins val um tvo kosti: Núverandi stjórn hægri popúlisma eða vinstri stjórn þar sem Píratar væru stærstir en ekki endilega í forystu.
Á þennan veg skrifar Þorsteinn Pálsson í nýjasta pistli sínum á Hringbraut þar sem hann horfir yfir hin pólitísku hæðardrög og dalverpi: \"Stjórnarflokkarnir þurfa að auka fylgi sitt um fjörutíu prósent til að halda meirihlutanum. Slík sveifla er vitaskuld ekki útilokuð. En líkurnar eru meiri á vinstri stjórn eins og sakir standa og að öðru óbreyttu,\" bendir hann á.
Í þessu efni er honum hugleikið hvað þeir flokkar sem helst tapa nú um stundir hafa brugðist misjafnlega við pólitískri höfnun: \"Í Bjartri framtíð knúði grasrótin umsvifalaust fram leiðtogaskipti. Markmiðið er augljóslega að endurheimta fyrri styrk. Hvort sem leiðtogaskiptin voru nauðsynleg í þeim tilgangi eða ekki er endurheimtumarkmiðið skýrt.\"
Öðru mali gegni um Framsókn en þar sé grasrótin einhuga um þá skýringu að fylgishrunið sýni aðeins normalstöðu flokksins: \"Það bendir til þess að flokkurinn hafi þegar sætt sig við að hafa ekki sömu áhrif á næsta kjörtímabili. Þó að uppsveiflan hafi verið mikil síðast er óvenjulegt að jafn breið eining skapist í flokki um að kosningasigur hafi ekki verið normal. En fallast verður á að það er skynsamleg ályktun,\" skrifar hinn pólitíski reynslubolti.
Hann segir Pírata aðallega hissa: \"Píratar sitja uppi með allt fylgið sem horfið hefur af öðrum. Þeir hafa um margt brugðist hyggilega við nýrri og óvæntri stöðu. Þannig viðurkenna talsmenn þeirra að óánægja með aðra ráði meir um þessa sveiflu en eigið ágæti.\"
Samfylkingin og Sjálfstæðisflokkurinn sitji klumsa hjá: \"Samfylkingunni hefur ekki tekist að nýta sér stjórnarandstöðuna til að spyrna við fæti eftir einn mesta kosningaósigur í stjórnmálasögu síðari ára. Á sama hátt hefur Sjálfstæðisflokknum ekki tekist að nýta sér ríkisstjórnarsetuna til að færa sig í átt til þeirrar lykilstöðu sem hann áður hafði.\"
Í þessari stöðu séu mestar líkur á nýrri vinstri stjórn, en þó kunni krafan á meiri miðju að vera undirliggjandi: \"Allt eins gæti verið að meirihluti kjósenda vildi ríkisstjórnarkost nær miðjunni en þær aðstæður leyfa sem nú blasa við. Ólíklegt er að slíkur kostur opnist nema staðan brotni meira upp,\" skrifar Þorsteinn Pálsson í nýjasta pistli sínum á Hringbraut.
