\"Næstu átök um virkjanir muna snúa að hálendinu. Það er allt önnur ella að vaða inn á hálendið með virkjunum en halda áfram að virkja á láglendi, þar sem manngert umhverfi rúlar, og virkjanir eru nú þgar í mörgum ám.\"
Þetta skrifar Össur Skarphéðinsson, alþingismaður og fyrrverandi ráðherra á fésbók sína í dag og bendir á að hálendið sé í dag nánast algerlega ósnortið: \"Sú staðreynd í sjálfu sér gerir það óhemju verðmætt. Hálendið er til dæmis gríðarlega sterkur segull fyrir hefðbundinn túrisma, og þar með uppspretta gríðarlegra efnislegra verðmæta. Það eru hrein efnahagslega rök fyrir verndun þess.\"
Hann segir að í óefnislegum skilningi sé það þýðingarmikið fyrir sjálfsmynd Íslendinga að geta samsamað sig ósnortnum víðernum: \"Þannig er það partur af sterkri mynd margra Íslendinga af sjálfur sér og hvar þeirra pláss er í hinni stærri tilveru. Þetta hefur sjálfstætt gildi fyrir marga, þar á meðal mig,\" skrifar þessi reynslumikli stjórnmálamaður sem settist fyrst á þing fyrir meira en aldarfjórðungi.
\"Ef virkjanir eru leyfðar á jaðri hálendisins kallar það á vegi og raforkuvirki til að tengja þær við samgöngukerfið og flutningskerfið,\" skrifar hann áfram og segir að þá skapist um leið freisting til að nýta fjárfestinguna til að fara aðeins innar á hálendið til að fá fyllri nýtingu á fjármagnið: \"Verði ekki rönd við reist verður hálendið þannig tekið til notkunar bút fyrir bút. Þetta mun enda með háspennulínu yfir hálendið mitt, og í kjölfar mun koma uppsteyptur vegur. Þar með yrðu hin ægifögru, ósnortnu hrjóstur Íslands komin undir efnahagslegt landnám þeirra sem vilja nýta og virkja hálendið. Um þetta snýst deilan.\" skrifar Össur Skarphéðinsson í dag og kallar eftir þjóðaratkvæðagreiðslu um afstöðu landsmanna til nýtingar ellegar verndunar hálendisins: \"Það á að verða verkefni lýðræðisstjórnarinnar sem tekur við eftir kosningar.\"
