Fundur umhverfis- og samgöngunefndar Alþingis hófst klukkan 8:30 í morgun. Fundurinn fer fram að beiðni Vilhjálms Árnasonar, þingmanns Sjálfstæðisflokksins og eins nefndarmanna, en hann hefur þungar áhyggjur af stöðu innanlandsflugs hér á landi.
Á fundinum eru fulltrúar frá Erni og Flugfélagi Íslands ásamt fulltrúum Isavia. Óskaði Vilhjálmur eftir fundinum í kjölfar þess að flugrekstraraðilar hafa dregið saman seglin í áætlunarflugi innanlands og lýst yfir erfiðleikum í rekstri.
„Ég hef miklar áhyggjur af þessum óveðursskýjum sem eru að hrannast yfir innanlandsflugið, bæði hvað það er mikil fækkun á farþegum og yfirlýsingum rekstraraðila um rekstrarvanda hjá þeim. Þeir hafa verið að grípa til þess ráðs að fækka ferðunum, draga úr tíðni ferða til nokkurra áfangastaða,” segir Vilhjálmur í samtali við Mbl.is.
Hann segir brýnt að ný samgönguáætlun til næstu fimm ára komi til framkvæmda sem fyrst, þar sem helst muni um hina svokölluðu skosku leið í innanlandsflugi. „Þetta er akkúrat á sama tíma og við erum búin að gefa út nýja samgönguáætlun þar sem við teljum mjög mikilvægt fyrir byggðir landsins að efla innanlandsflugið.”
Í skosku leiðinni felst að ríkið niðurgreiði flugfargjöld íbúa á landsbyggðinni. Í samgönguáætlun er lagt til að skoða kosti þessarar leiðar.
Vilhjálmur segir að á fundinum vonist hann til þess að fá betri yfirsýn yfir stöðu mála og hvað þurfi að gerast til þess að erfið staða innanlandsflugs geti snúist við.
