Hópur flóttafólks á Íslandi kom saman í morgun fyrir utan Útlendingastofnun í Hafnarfirði til þess að mótmæla því að fólki sé vísað úr landi og aðstæðum flóttafólks í flóttamannabúðunum á Ásbrú. Mótmælin voru skipulögð af hópnum Refugees in Iceland. Mbl.is greinir frá.
Kröfur hópsins eru í fimm liðum. Hópurinn fer fram á að brottvísunum úr landi verði alfarið hætt, að allt flóttafólk fái áheyrn sinna mála í kerfinu, að flóttafólk á Íslandi fái atvinnuleyfi, að flóttafólk fái jafnan aðgang að heilbrigðisþjónustu og að flóttamannabúðunum á Ásbrú verði lokað.
Í lýsingu á mótmælunum í viðburði á Facebook segir að flóttafólk hafi óskað eftir fundi með stjórnvöldum og að hlustað verði á kröfur þeirra, en að eina svarið sem þau hafi fengið verið þögn.
Mótmælin halda nú áfram við aðalskrifstofu Útlendingastofnunar að Dalvegi í Kópavogi. Mótmælin hafa farið friðsamlega fram og hefur lögreglan, sem var og er viðstödd mótmælin til að sinna eftirliti, ekki haft afskipti af mótmælendum. Einn mótmælendanna í Hafnarfirði gekk á milli lögreglumannanna og afhenti þeim rósir. Flestir lögreglumannanna festu rósirnar í klæðnað sinn og skörtuðu þeim á meðan mótmælunum stóð.
Refugees in Iceland stóð einnig fyrir mótmælum í brottfararsal flugstöðvar Leifs Eiríkssonar í síðasta mánuði. Þá beindust mótmælin gegn Icelandair, sem hefur aðstoðað við brottvísanir flóttafólks.
Tvær sjálfsvígstilraunir með skömmu millibili
Fréttablaðið greindi frá því í gær að flóttamaður sem hefur dvalið að Ásbrú hafi reynt að svipta sig lífi. Í stað þess að aðstoða manninn hafi lögreglan handtekið hann blóðugan og buxnalausan, að því er íbúar í grenndinni vitnuðu til um.
Refugees in Iceland vöktu athygli á sjálfsvígstilrauninni á Facebook síðu sinni og sömuleiðis annarri sjálfsvígstilraun sem átti sér stað um liðna helgi. Segir hópurinn óbærilegt að dvelja í flóttamannabúðunum á Ásbrú og að þau þarfnist hjálpar.
