Viðskiptaráð Íslands telur ljóst að skattbyrði bæði einstaklinga og fyrirtækja hafi þyngst í tíð núverandi ríkisstjórnar; skatttekjur ríkissjóðs sem hlutfall af landsframleiðslu hafi vaxið úr 27,1% í 30,2 á milli tveggja síðustu ára og allir helstu skattstofnar hafi hækkað.
Ráðið segir ríkisútgjöld vera að aukast á ný, aðhaldi í rikisfjármálum sé greinilega lokið í bili; launakostnaður ríkisins hafi aukist um 6% á milli þessara ára og önnur rekstrargjöld um 4%. Samtals nemi útgjaldaaukningin vegna þessara tveggja liða 13 milljörðum króna. Ef við bætist aukin vaxtaútgjöld ríksins upp á 4 milljarða króna hafi útgjöld ríkisins því aukist um 17 milljarða í heildina.
Viðskiptaráðið rýnir sérstaklega í aukna skattbyrði og segir að hlutfallslega hafi aukningin þar verið mest í tilviki fjármagnstekjuskatts einstaklinga og fyrirtækjaskatts, en í báðum tilvikum hafi aukningin verið meiri en 35%. Þá vekji athygli að tryggingargjöld hafi hækkað um 5% milli ára þrátt fyrir að atvinnuleysi hafi minnkað úr 5,4% í 5% samkvæmt tölum Hagstofunnar.
Ljósi punkturinn sé þó sá að afkoma ríkissjóðs hafi batnað um 47 milljarða króna á milli tveggja síðustu ára og tímabilið hafi verið það fyrsta frá hruni sem ríkið skili afgangi. Sá afgangur hafi hinsvegar ekki verið nýttur til skattalækkana heldur þenslu og útgjaldaaukningar.
