\"Árið sem nú er nærri liðið hefur sannarlega verið viðburðaríkt fyrir okkur, hópinn sem nefndur er Viðreisn. Við höfum undirbúið stofnun stjórnmálaflokks sem berst fyrir réttlátu samfélagi, stöðugu efnahagslífi með áherslu á heiðarleika, markaðslausnir, vestræna samvinnu og jafnrétti.\"
Með þessum orðum gefst annáll Viðreisnar, nýjasta stjórnmálaflokksins á Íslandi, en fyrir áhugafólk um stjórnmál er athyglisvert að skoða inntak hans, en það eru þau Geir Finnsson og Katrín Kristjana Hjartardóttir sem eru skráð fyrir honum.
\"Við byrjuðum á því að halda áfram með öfluga málefnafundi frá því haustið 2014, en strax þann 8. janúar héldum við fund um markaðslausnir í sjávarútvegi. Þar var niðurstaðan sú að heppilegt væri að bjóða á hverju ári upp hluta kvótans. Hlutfallið markaðist af því að það yrði sem næst aflagjaldinu eins og það er nú, en heildarfjárhæðin myndi markast af aðstæðum á markaði, en ekki ákvörðun stjórnmálamanna eða embættismanna. Á góðu ári myndu útgerðarmenn keppast um kvótann, en verðið líklega lækka þegar aðstæður væru erfiðari. Þær útgerðir sem væru í þrengingum gætu sleppt því að bjóða í kvótann það árið.
Því næst héldum við fund um menntamál þann 4. febrúar, en yngri kynslóð Viðreisnar sá alfarið um skipulagið á honum. Skemmtilegar umræður mynduðust um stöðnun menntakerfisins og nauðsyn þess að gerast samkeppnishæf við nágrannaþjóðir okkar. Mikið var rætt um einkaframtak í samstarfi við ríkisrekna skóla, en það virðist sýna sig að stór fjöldi nemenda sækist í aðstoð fyrirtækja á borð við Nóbel Námsbúðir þegar ríkjandi kerfi virðist ekki sinna störfum sínum sem skyldi.
Á meðan Viðreisn hélt áfram að mótast gerðu ríkisstjórnarflokkarnir tveir sitt allra besta við að draga úr fylgi sínu. Það sem bar hæst var ákvörðun Gunnars Braga Sveinssonar, utanríkisráðherra, að slíta viðræðum við Evrópusambandið þann 12. mars án þess þó að spyrja Alþingi á undan. Sem var, eftiráhyggja, skynsamleg ákvörðun í ljósi þess að þorri landsmanna hefði frekar viljað ljúka aðvildaviðræðum og sjá samning sem hefði að öllum líkindum verið þjóðinni til hagsbóta, en hagsmunaröflum Framsóknar að falli.
Viðreisn lét vel í sér heyra á þessum tíma, þó ekki hafi staðið til að gera það svo fljótt. Örfáum klukkustundum eftir ákvörðun utanríkisráðherra mættu ríflega hundrað manns niður á Austurvöll til að mótmæla og síðar fylgdu fleiri, talsvert stærri mótmælafundir sem töldu mörgþúsundir manna. Jafnframt var efnt til stuðningsmannafundar þar sem niðurstaðan var sú að nauðsynlegt væri fyrir nýtt, heiðarlegt, frjálslynt og markaðssinnað afl að leiða ríkisstjórn eftir næstu kosningar til Alþingis, enda augljóst að núverandi stjórn myndi ekki efna gefin kosningaloforð.
Sökum alls þessa þótti kjörið að næsti málefnafundur okkar snerist um aðild Íslands að Evrópusambandinu og eins og búast mátti við komust færri að en vildu þegar hann var haldinn 23. mars. Alls mættu yfir 200 manns á þennan fund. Þeir Ásgeir Jónsson og Vilhjálmur Egilsson fjölluðu um Evrópusambandsaðild með mjög málefnalegum hætti.
Mætingin jókst með hverjum fundi og voru allt frá um 75 til rúmlega 200 manns sem sýnir okkur aðeins mikilvægi þess að fara vandlega yfir alla helstu málaflokka með nýjar lausnir að leiðarljósi þegar kemur að því að bjóða fram til kosninga.
Fundirnir voru flestir sýndir í beinni útsendingu og síðar geymdir sem upptökur á netinu. Fyrir það fær Jóhann Hinrik hjá CCXI ehf. kærar þakkir fyrir.
Síðar, þann 4. júní, hélt Viðreisn stefnumótunarfund sem var framhald af svipuðum fundi ári áður. Líkt og venjulega var fundurinn fjölsóttur, yfir hundrað manns mættu og komu margar gagnlegar tillögur fram sem stefnumótunarhópur hefur síðan unnið með, samhliða niðurstöðum málefnafunda í samstarfi við sérfræðinga frá hverju sviði.
Í júlí gerðu Grikkir samkomulag við ESB um neyðarlán sem kallaði á róttækar efnahagsaðgerðir og niðurskurð. Vildu nokkrir meina að högg væri komið á stuðningsmenn aðildar Íslands að sambandinu, en því svaraði Benedikt Jóhannesson á þá leiðina að slæm skuldastaða Grikkja og óábyrg stjórn væri ekki sambærileg Íslandi. „Við höfum lýst því yfir að aðalmarkmið okkar er að koma á stöðugleika og frelsi í viðskiptum og markaðslausnum þar sem það á við. Mörgu af því náum við með fullri Evrópusambandsaðild“.
Eftir sumarfrí var kominn tími fyrir nýja málefnafundi. Þann 29. september var rætt um utanríkismál, m.a. með tilliti til þvingunaraðgerða gegn Rússlandi. Var niðurstaðan sú að farsælast væri fyrir Ísland að halda áfram samstöðu með vestrænum þjóðum.
Í nóvember var tími kominn til að kynnast landsbyggðinni ögn betur. Þann 10. nóvember héldu þau Benedikt Jóhannesson, Katrín Kristjana Hjartardóttir og Jórunn Frímannsdóttir til Akureyrar og kynntu Viðreisn fyrir skemmtilegum hópi fólks. Sköpuðust líflegar umræður í kjölfarið og fór umræðan meðal annars í jafnt atkvæðavægi, einkarekna skóla og kostnað við bankaeinokun.
Í desember birti Viðskiptablaðið niðurstöðu könnunar sem fjölmiðillinn lét Gallup vinna fyrir sig. Þar kom fram að tæplega 40% þekktu Viðreisn, en af þessum hópi sagðist um fjórðungur líklegt eða hugsanlegt að hann myndi kjósa flokkinn ef kosið væri til þings.
Árið 2016 höldum við áfram að móta Viðreisn og hlökkum til að gera það í samstarfi við alla þá sem áhuga hafa á stofnun frjálslynds stjórnmálaflokks sem vöntun hefur verið á í of langan tíma. Enn er nokkuð langt í kosningar og mikilvægt að undirbúa framboð af fullum krafti.
Alþingiskosningar 2017 verða þjóðinni mjög mikilvægar, enda löngu kominn tími fyrir heiðarlegt stjórnmálaafl sem stendur við gefin loforð um frjálslyndi og jafnrétti.\"
Annáll Viðreisnar, sem hér er vitnað til endar svo með óskum um gleðilegt nýtt ár og þökkum fyrir viðburðaríkt og fróðlegt liðið ár.
