"Höftin eru verstu mistök sem voru gerð í kjölfar hrunsins. Það að hafa ekki afnumið þau eru einnig verstu mistökin," sagði Jón Daníelsson, prófessor í hagfræði við London School of Economics á fundi Samtaka atvinnulífsins í morgun sem fjallaði um afnám haftanna.
Jón sagði að Íslendingar hefðu eftir engu að bíða. „Það er hægt að afnema höftin mjög hratt og það er hægt að gera það strax,“ sagði Jón og líkti Íslendingum við gamla frændann sem langaði alltaf til þess að kaupa sér tölvu en væri sífellt að bíða eftir næstu uppfærslu frá Apple. Að lokum myndi hann aldrei eignast tölvuna.
Hann sagði kostnað vegna haftanna vera mikinn: Í fyrsta lagi einangri þau landið frá umheiminum og búi til ákveðinn stöðugleika og gera fyrirtækjum þannig kleift að þróast og dafna innan haftanna. Þannig geti skapast miklir hagsmunir fyrir því að viðhalda höftunum. Þá séu einnig auknar líkur á spillingu. Þó að ekki sé mikið rætt um það á Íslandi, gerist það í öðrum löndum að sögn Jóns. Þá verði efnahagssveiflur meiri og langtímahagvöxtur minni.
„Við skulum skoða hópinn sem við höfum valið okkur að tilheyra,“ sagði hann og taldi m.a. upp Grikkland, Kúbu og Norður-Kóreu. Með því að vera með höft erum við að segja að við séum ekki alvöru land sem ræður við sín mál. „Þú hefur valið að vera þorpsfíflið. Þetta er eins og verndaður vinnustaður,“ sagði hann.
