„Á þessu stigi eru þetta algjörlega óútfærðar hugmyndir," sagði Þórunn Sveinbjarnardóttir formaður Bandalags háskólamanna eftir fund sinn og Félags íslenskra hjúkrunarfræðinga í morgun með fulltrúum stjórnvalda, en þar var hugað að stofnun sáttanefndar í kjaradeilu þessara aðila.
Bæði háskólamenn og hjúkrunarfræðingar munu ræða hugmyndir stjórnvalda um sáttanefndina í sínum ranni í dag, en Ólafur G. Skúlason formaður Félags íslenskra hjúkrunarfræðinga tekur undir með Þórunni og segir fátt nýtt hafa komið fram á fundinum í morgun.
Það er því útlit fyrir að verkfall haldi áfram á þriðja mánuð hjá háskólamönnum, en réttir tveir mánuðir eru í dag frá því að verkfall þeirra hófst. Hjúkrunarfræðingar hafa verið í verkfalli öllu skemur, eða í hálfa aðra viku, en miklu munar enn á tilboði samninganefndar ríkisins og kröfum þeirra við samningaborðið; ríkið bíður 18% launahækkun á þremur árum, hjúkrunarfræðingar krefjast minnst 30% launahækkunar svo þeir haldi í við viðmiðunarstéttir sínar.
Fundinn í morgun sátu, auk fulltrúa BHM og FÍH, efnahagsráðgjafi forsætisráðherra og skrifstofustjóri í félagsmálaráðuneytinu sem greindu frá hugmyndum ríkisstjórnarinnar um skipun sáttanefndar.
Ekki er búið að skipa í nefndina, en skipan hennar er háð því að deiluaðilar fallist á að nefnd verði skipuð.
„Í fljótu bragði verður ekki séð að svona nefnd geti gert eitthvað umfram það sem ríkissáttasemjari gerir. Það liggur auðvitað fyrir að deilan er í hnút því ríkisvaldið vill ekki færa sig nær okkur," sagði Þórunn jafnframt eftir fundinn í morgun.
