Verkafólk hér með 30% lægri laun

Umræðan um launamun íslensks verkafólks og launamanna á hinum Norðurlöndunum hefur enn blossað upp í aðdraganda þeirra átaka á vinnumarkaði sem virðast fram undan. Samtök atvinnulífsins telja að mjög hafi dregið úr þessum launamun á síðustu árum, en Starfsgreinasamband Íslands, sem nú hefur slitið á viðræður við SA, þvertekur fyrir að svo sé.
Þegar hagtölur eru skoðaðar kemur tvennt í ljós í þessum efnum sem vekur athygli. Áberandi er að munurinn á dagvinnulaunum á Íslandi og hinum Norðurlöndunum er mun minni meðal tekjuhærri hópanna en hjá tekjulægri hópunum. Þannig eru og dagvinnulaun stjórnenda á Íslandi í raun 5% hærri en að meðaltali á hinum Norðurlöndunum. Hluta af þessum mun má, að sögn hagteymis ASÍ skýra með minni tekjujöfnunaráhrifum íslenska skattkerfisins, þar sem hátekjur hér á landi eru skattlagðar mun minna en á hinum Norðurlöndunum og því verður hlutfallslega meira eftir í buddu hátekjuhópa hér á landi.
Mestur munur á dagvinnulaunum er hins vegar gagnvart verkafólki og þjónustu-, sölu- og afgreiðslufólki samkvæmt sömu heimildum. Hér á landi eru dagvinnulaun verkafólks allt að 30% lægri en að meðaltali á hinum Norðurlöndunum. Þá er einnig áberandi að meiri munur er á launum kvenna en karla í öllum starfsstéttum. Það bendir til þess að óleiðréttur launamunur kynjanna sé meiri hér á landi en á hinum Norðurlöndunum.