Ólafur Ragnar Grímsson mun vera þess albúinn að fara fyrir utanþingsstjórn sem forsætisráðherra, komi til stjórnarkreppu sem frekar er búist við.
Ef pattstaða kemur upp á Alþingi og ekki verður unnt að mynda meirihlutastjórn í nóvember, mun forseti Íslands hafa látið það berast til formanna stjórnmálaflokkanna að hann muni þá skipa utanþingsstjórn í byrjun desember. Ekki verði gefinn lengri tími til stjórnarmyndunar ef horfur verða slæmar.
Þessi nöfn ráðherra í utanþingsstjórn hafa verið nefnd:
Ólafur Ragnar Grímsson forsætisráðherra.
Már Guðmundsson, seðlabankastjóri, fjármálaráðherra.
Þorsteinn Pálsson atvinnuvegaráðherra (sjávarútvegs-landbúnaðar-ferðamála- og iðnaðarráðherra).
Össur Skarphéðinsson utanríkisráðherra og einnig umhverfisráðherra.
Ragnheiður Ríkharðsdóttir menntamálaráðherra.
Álfheiður Ingadóttir heilbrigðisráðherra.
Helgi Hjörvar félagsmálaráðherra.
Björg Thorarensen innanríkisráðherra (dóms-og samgönguráðherra).
Þannig yrði ríkisstjórnin skipuð átta ráðherrum en nú eru ellefu.
Eins og sjá má er hér mikið mannval á ferð. Með undirbúningi af þessu tagi er ætlunin að setja pressu á forystumenn stjórnmálaflokkanna að vinna rösklega og af fullri alvöru því þingmenn allra flokka vita ekkert verra en utanþingsstjórn.
