Nú er ljóst að ekkert verður af því að Glitnir selji Íslandsbanka, segir í ítalegri fréttaskýringu í Kjarnanum sem hefur tekið saman tíðindi næturinnar.
„Engar upplýsingar voru um það í tilkynningu fjármála- og efnahagsráðuneytisins sem send var út í nótt hvað ríkið mun gera við þessa nýju eign sína. Þ.e. hvort það hyggist eiga hann eða hvort hann eigi að seljast,“ segir Kjarninn.
Vísað er til þess að á fimmta tímanum í nótt barst tilkynning til fjölmiðla þar sem Fjármála- og efnahagsráðuneytið tilkynnti að íslenska ríkið væri að fara að eignast annan banka, Íslandsbanka, að öllu leyti. Eini stóri viðskiptabankinn sem verður þá ekki nánast að fullu í ríkiseigu að loknu slitaferli gömlu bankanna verður Arion banki.
Í tilkynningunni segir að þessi hafi orðið niðurstaða funda sem ráðgjafar stærstu kröfuhafa Glitnis, núverandi eiganda 95 prósent hlutar í Íslandsbanka, og framkvæmdahópur um losun fjármagnshafta áttu á tímabilinu 25. september til 13. október vegna breytinga á stöðugleikaframlagi kröfuhafanna. Eftir þessar breytingar telur framkvæmdahópurinn að slitabú Glitnis sé að mæta stöðugleikaskilyrðum stjórnvalda og því séu forsendur fyrir undanþágu frá gjaldeyrishöftum fyrir hendi. Og eftir þessa breytingu er íslenska ríkið orðið eigandi að tveimur af þremur stærstu bönkum landsins.
Ekki liggur að mati Kjarnans fyrir um hversu mikið endanlegt stöðugleikaframlag mun hækka við þessa breytingu. Það kemur ekki í ljós fyrr en ríkið selur Íslandsbanka, ef það ákveður að gera það. Fjölmörgum spurningum er ósvarað og hægt er að reikna með snarpri umræðu þegar þingfundur hefst síðar í dag.
„Þá er eignarhald ríkisins á nýjum banka einnig athyglisvert í ljósi þess að í frumvarpi sem Bjarni Benediktsson, fjármála- og efnahagsráðherra, lagði fram á síðasta þingi, var gengið út frá því að Bankasýsla ríkisins, sem heldur á hlutum ríkisinsí fjármálafyrirtækjum, yrði lögð niður um áramót og eignarhlutir ríkisins í bönkunum færðir beint undir ráðherrann. Í fjárlagafrumvarpi næsta árs er ennfremur ekki gert ráð fyrir því að Bankasýslan fái eina krónu frá ríkinu,“ segir í fréttaskýringu Kjarnans.
Á samfélagsmiðlum er Íslandsbankamálið einnig mál málanna þennan morguninn. Þannig skrifar Jóhann Kristjánsson, sem hefur reynslu af rekstri og lætur sig peningamál samfélagsins varða:
„Trúir einhver maður því að kröfuhafar séu að \"bjóða\" ríkinu Íslandsbanka? Fáir hafa skilið uppgjör föllnu bankana og hinn fræga 800 milljarða gróða sem forsætis lofaði að ná út með kylfu og haglara. Ekkert hefur þó gengið né rekið mánuðum og árum saman. En nú er \"lausnin\" komin, ríkið eignast bankann sem almenningur er búinn að byggja upp með ofboðslegum vaxtagreiðslum og þjónustugjöldum á gjöld ofan. Um leið og ríkið hefur eignast bankann þá þarf að einkavæða. Ekki bara Íslandsbanka heldur Landsbankann einnig. Þá er hægt að taka annan snúning á helmingaskiptunum. Góðærið er hér á ný,\" skrifar Jóhann Kristjánsson.
