Odd Roger Enoksen, varnarmálaráðherra Noregs, hefur sagt af sér embætti eftir að upp komst um kynferðislegt samband hans við unga konu.
Norskir miðlar greina frá.
Enoksen komst í kynni við konuna árið 2005 sem þá var átján ára og hann fimmtugur að aldri.
Konan kom í vettvangsferð með skólanum sínum að heimsækja norska þingið og þar fengu nemendurnir að hitta Enoksen sem átti í nánum samskiptum við konuna eftir ferðina.
„Ráðherrar eiga líka einkalíf, og ráðherrar geta einnig átt sambönd fyrir utan hjónabandið“ sagði Enoksen við blaðamenn þegar hann tilkynnti afsögn sína fyrr í dag.
Í umfjöllun VG.no um málið segir að Enoksen og konan, sem er á þrítugsaldri í dag, hafi kallað hann „kynferðislegan lærifaðir“ hennar. Enoksen staðfesti það.
Konan greindi fyrst frá sambandinu nýlega en hafði ekki þorað að stíga fram áður. Hún segir sambandið hafa haft mikil áhrif á líðan hennar síðustu 15 ár.
Konan og Enoksen greinir á um hvers eðlis samband þeirra var, konan segist hafa verið í sambandi við Enoksen en hann segir að aðeins hafi verið um framhjáhald að ræða.
