Þetta kom fram í úttekt Kastljóss í gærkvöld í flóttamannavandanum í Evrópu en þar var rætt við ráðherrann um hlutverk Íslands í því efni. Ólöf sagði þar að enn hefði ekki verið tekin ákvörðun um komu fleiri flóttamanna en þeirra fimmtíu sem samið var um í sumar.
Fundur innanríkisráðherra Evrópusambandsins og Schengen-ríkjanna um málefni flóttamanna lauk í Brussel í gær, en þar var rætt um hvort hægt sé að flytja fleiri flóttamenn innan Schengen: \"Þessi fundur í gær snérist um þann mikla vanda sem að blasir við Evrópusambandinu og allri Evrópu út af þessum stríða straumi flóttamanna frá stríðshrjáðum svæðum,“ sagði Ólöf í þættinum.
Að hennar mati snýst vandinn um tvö atriði: \"Annars vegar það að Evrópusambandið hefur verið að velta því fyrir sér hvort hægt sé að létta af þeim þjóðum sem að hafa fengið mesta strauminn til sín með því að flytja fólk til innan svæðisins. Þá hafa menn verið að tala um samanlagt 160 þúsund einstaklinga. Á hinn bóginn var verið að ræða hvaða hugsanlegu tillögur myndu koma fram til að styrkja ytri landamæri Schengen, sem eru brostin núna, og auka skráningu og hvernig hægt sé að flytja fólk til baka frá öðrum þjóðríkjum sem að þurfa ekki á hjálp að halda,“ sagði Ólöf í Kastljósi.
Hún segir að ekkert samkomulag hafa náðst á fundinum um hvernig ætti að flytja fólk til innan Schengen svæðisins, þótt fulltrúar flestra ríkja væru sammála um að bregðast þyrfti við ástandinu: \"Í aðdraganda þessa fundar gaf Evrópusambandið til kynna að til umræðu væri reglugerð, sem er í drögum núna, um að það yrði búin til reikniregla sem yrði þannig að þegar neyð skapast eins og nú er, þá gæti Evrópusambandið sjálft ákveðið að dreifa fólki eftir ákveðinni dreifireglu innan Evrópusambandsins, og jafnvel innan EFTA ríkjanna líka,“ segir Ólöf í þættinum.
Og hún bætti við: \"Ég held að umræðan í gær hafi leitt það í ljós að þetta sé kannski ekki besta aðferðin til þess að eiga við þetta mál. Bæði er hér ekki verið að ráðast á rót vandans, og svo eru það þeir sem koma til Evrópu, vilja fara til tiltekinna landa, en þeir vilja ekkert láta senda sig til einhverra annarra landa. Þessi umræða fór ekki af stað á þessum fundi af neinni alvöru.“
