Engar viðræður eiga sér stað á milli Íslands og Bandaríkjanna um varanlega staðsetningu bandarísks liðsafla á Íslandi, að því er fram kemur í yfirlýsingu íslenska utanríkisráðuneytisins í gærkvöld.
Hins vegar sé ljóst að umhverfi öryggismála í Evrópu hefur breyst mikið á umliðnum árum og, í því ljósi, eins og utanríkisráðuneytið hafi áður greint frá, hafi eðlilega átt sér stað samtöl um mögulega aukin umsvif Bandaríkjanna og annarra ríkja Atlantshafsbandalagsins á norðanverðu Atlantshafi og Íslandi í samræmi við sameiginlegar varnarskuldbindingar.
Í fréttum RÚV í gærkvöld var því haldið fram að bandarísk stjórnvöld hefðu ef til vill í huga að koma upp varanlegri aðstöðu fyrir kafbátarleitarvélar sínar á Íslandi, en áratugur er nú liðinn frá því Bandaríkjaher yfirgaf Ísland með allt sitt herlið.
Það sem gaf þessari frétt byr bundir báða vængi er áhugi sjóhers Bandaríkjanna á að dusta rykið af einu flugskýlinu á Miðnesheiði sem kafbátarleitarvélar notuðu hér í eina tíð, svo herinn verði betur í stakk búinn til að sinna eftirliti á norðanverðu Atlantshafi í ljósi aukinnar kafbátaumferðar Rússa um það hafsvæði.
Enn sem komið er virðist hins vegar litlar líkur vera á því að herinn sé að snúa aftur til varanlegrar setu.
