Róbert R. Spanó, forseti Mannréttindadómstóls Evrópu, fékk tölvupósta frá þekktum einstaklingum með ýmsum ásökunum, meðan Landsréttarmálið var til meðferðar í Strassborg.
Þetta kemur fram í helgarviðtali við hann í Fréttablaðinu í dag, en hann lætur af störfum við dómstólinn núna um mánaðarmótin.
„Þótt Róbert vilji ekki gera mikið úr upphrópunum vegna Landsréttarmálsins viðurkennir hann, aðspurður, að hafa orðið fyrir aðkasti að heiman. Honum bárust tölvupóstar frá þekktum einstaklingum með ýmsum ásökunum. Fjölskylda hans á Íslandi hafi orðið fyrir aðkasti líka,“ segir í viðtalinu en Róbert segist ekki vilja ræða málið nánar að sinni. „Ég bara leyfi mér að hafa þetta fyrir mig og ætla að geyma þetta fyrir endurminningarnar,“ segir hann.
Róbert segir aðkast af þessum toga mjög sjaldgæft. „Hér hafa dómarar dæmt í málum sem hafa fellt ríkisstjórnir en þeirra persónur ekki verið dregnar inn í það eins og gerðist heima fyrir.
Hægt er að lesa viðtalið við Róbert í heild hér.
