Fullljóst þykir að kostnaður vegna Vaðaheiðarganga mun fara vel fram úr upphaflegri áætlun - og þar af leiðandi mun það lán sem tekipð var til gangagerðareinnar ekki duga.
Þetta kemur fram í Morgunblaðinu í dag, en eins og fram hefur komið í fjölmiðlum á undanliðnum mánuðum hafa orðið miklar tafir á verkinu vegna vatnsaga, jafnt Eyjafjarðarmegin og Fnjóskadalsmegin. Hefur af þeim sökuim þurft að fresta burunum og sprengingum svo vikum skiptir.
\"Eins og staðan lítur út núna mun kostnaður fara 14% fram úr áætlun og þá þarf aukið fé til að klára framkvæmdina. Stjórn fyrirtækisins á þó eftir að fara betur yfir málin og mun skila endurbættri rekstraráætlun í haust og þá mun staðan skýrast betur,\" segir Guðlaugur Þór Þórðarson, varaformaður fjárlaganefndar í Morgunblaðinu í morgun, en í svari stjórnar Vaðlaheiðarganga við fyrirspurn fjárlaganefndar kemur fram að kostnaður vegna framkvæmdarinnar er talinn fara 1.500 milljónir fram úr áætlun.
Í umfjöllun um mál þetta í Morgunblaðinu í dag segir Guðlaugur þó að taka þurfi fram að svör stjórnarinnar séu til eftirbreytni fyrir aðrar stofnanir. Hins vegar segir hann einnig alveg ljóst að ekki hafi verið vandað til verka við undirbúning af hálfu stjórnvalda; gagnrýni hafi komið fram en á hana hafi ekki verið hlustað. Nú sé þó komið á daginn að sú gagnrýni hafi átt rétt á sér og úr þeirri stöðu verði að vinna.
