Úrgangur frá heimilum og atvinnulíf eykst og eykst í takt við aukna velferð og aukna neyslu landsmanna.
Árið 2016 féll til á einu ári á Íslandi yfir milljón tonn af úrgangi. Árið áður hafði magnið verið um 870 þúsund tonn og var aukningin á milli ára rétt tæp 200 þúsund tonn, eða 23 prósent. Þetta er mun meiri aukning en varð á milli áranna 2014 og 2015 en þá reyndist aukningin tæp 7 prósent.
Þetta kemur fram í nýrri ársskýrslu Umhverfisstofnunar sem lesa má hér.
Þessa miklu magnaukningu á milli ára má að mestu leyti rekja til aukins magns jarðvegs–, jarðefna– og svokallaðs óvirks úrgangs, sem gera má ráð fyrir að fylgi auknum umsvifum í byggingariðnaði. Magnið sem féll þar til jókst um yfir 135 þúsund tonn frá fyrra ári.
Gríðarlegt magn heimilisúrgangs
Magn heimilisúrgangs jókst einnig mikið á milli ára, hvort tveggja blandaðs heimilisúrgangs og flokkaðs. Á milli áranna 2016 og 2015 jókst heimilisúrgangur um 13 prósent og er staðan orðin sú að hver landsmaður losar sig að jafnaði við 660 kg af heimilisúrgangi á ári. Það er sama magn og hver íbúi losaði sig við fyrir hrun efnahagskerfisins árið 2008 en árin strax eftir hrun varð mikill samdráttur í magni heimilisúrgangs.
Sambærilega þróun er einnig að sjá í öðrum úrgangsflokkum s.s. gömlum ökutækjum, plastúrgangi, viðarúrgangi, raftækjaúrgangi og pappírsúrgangi, en aukning í þeim var á bilinu 15 til 40 prósent á milli 2015 og 2016.
Of miklu fargað
Af þeim rúmlega milljón tonnum af úrgangi sem féll til árið 2016 fóru rúm 15 prósent til endurvinnslu, rúm 63 prósent fóru í aðra endurnýtingu, en þar munar mestu um mikið magn jarðvegs–, jarðefna– og óvirks úrgangs sem nýtt var til landmótunar og sem fyllingarefni, og 21 prósent fór í förgun.
Ennþá er því auðlindum fargað sem annars mætti nýta. Ef heimilisúrgangur er skoðaður sérstaklega er staðan verri en þar er hlutur förgunar 61 prósent og hlutur endurvinnslu 33 prósent.
