Kristján Þór Júlíusson, sjávarútvegs- og landbúnaðarráðherra, hefur lagt fram frumvarp sem heimilar innflutning á fersku kjöti, eggjum og ógerilsneyddri mjólk frá og með 1. september næstkomandi. Frumvarpið er lagt fram til að bregðast við niðurstöðu EFTA-dómstólsins og Hæstaréttar Íslands. Niðurstaða dómanna var að núverandi leyfisveitingakerfi, við innflutning á kjöti, eggjum og ógerilsneyddri mjólk og kröfu um frystingu kjöts, brjóti í bága við skuldbindingar Íslands samkvæmt EES samningnum.
Þorgerður Katrín Gunnarsdóttir, formaður Viðreisnar, Jón Gunnarsson, þingmaður Sjálfstæðisflokks og Guðmundur Andri Thorsson, þingmaður Samfylkingarinnar, eru gestir Lindu Blöndal í frétta- og umræðuþættinum 21 á Hringbraut í kvöld, þar sem þau ræða m.a. frumvarpið.
„Það má ekki nota mál eins og þetta til þess að byggja upp hindranir. Takmarkanir til þess að koma í veg fyrir samkeppni og nota hræðsluáróður, að mínu mati er þetta hræðsluáróður, ef við lesum gögnin, meðal annars frá ráðuneytinu, þá er alveg ljóst að t.d. frystiskyldan, hún gerir ekkert til þess að takmarka öryggi. Þetta er bara fár. Við erum aðilar að EES samningnum, sem er mikilvægasti viðskiptasamningur sem við Íslendingar höfum gert. Núna hafa menn í hátt í tíu ár reynt að komast hjá því að uppfylla samninginn,“ segir Þorgerður Katrín og bætir við að henni þyki það fráleitt að Sigurður Ingi Jóhannsson samgöngu- og sveitarstjórnarráðherra, sem hefur gagnrýnt frumvarpið, fari fram með hræðsluáróðri og setji sig sem stjórnvald í þá stöðu að ætla að „handpikka“ hvaða dómum hann hyggist fylgja og hverjum ekki.
Jón segir að undan þessu verði ekki vikist úr því sem komið er. „Það hefur fallið hér Hæstaréttardómur. Það blasir við að samstarf okkar skv. samningnum er í ákveðnu uppnámi og menn fylgja ekki þeim reglum sem er boðið upp á. Ef að við hefðum viljað gera á þessu breytingar þá hefði það þurft að gerast í ferlinu sem byrjaði fyrir tíu árum síðan og þá hefðu menn mögulega getað náð einhverjum meiri árangri í þessum efnum. Ég held að svarið við þessu sé í raun og veru það sem landbúnaðarráðherra er búinn að boða núna. Hann er að boða að það verði tekið til mótvægisaðgerða til þess einmitt að horfa ekki framhjá þeirri hættu sem fylgir þessu,“ segir Jón.
Hann bætir við: „Ég held að við svörum þessu mest og best með því að upplýsa neytendur, bæði með upprunavottorði og við eigum að mínu mati að ganga eins langt í því að geta upplýst um sýklalyfjanotkun í framleiðslunni eins og hægt er þannig að fólk, alveg meðvitað, sé þá að kaupa þetta. Við þurfum að taka sýni reglulega, við þurfum að krefjast heilbrigðisvottorða.“
Guðmundur Andri tekur í svipaðan streng. „Ég held að það blasi við að úr því að við erum í þessu bandalagi við Evrópuþjóðirnar, þá verðum við náttúrulega að fara eftir þeim reglum sem þar gilda. Það getur ekki bara gilt í aðra áttina, að við fáum að flytja allt sem við viljum og svo bara veljum við eftir hverju við förum frá þeim. Það er bara ekkert hægt. En málið er held ég pínulítið flókið. Það eru sóttvarnarlæknar sem halda því fram að hér sé náttúruleg vernd sem við höfum með því að vera eyja og með því að hafa einangraða stofna. Við þurfum náttúrulega að hlusta á þá og taka mið af því í okkar aðgerðum. Það sem ruglar dæmið er að það hefur lengi viðgengist hérna að láta eins og ef við flytjum inn eitthvað kjöt þá fáum við gin og klaufaveiki. Það hefur verið látið þannig en auðvitað er þetta ekkert þannig,“ segir Guðmundur Andri.
Nánar er rætt við Þorgerði Katrínu, Jón og Guðmund Andra í 21 í kvöld. Þátturinn hefst klukkan 21:00.
