Meðlimir í Stjórnarskrárfélaginu unnu skemmdarverk á styttunni af Kristjáni níunda Danakonungi fyrir utan stjórnarráðið í dag.
Hægt er að sjá myndband frá gjörningnum hér fyrir neðan en öryggisverðir voru fljótir að grípa til aðgerða.
Hópnum tókst að mála hönd Kristjáns bláa en í yfirlýsingu frá félaginu eru aðgerðirnar útskýrðar.
„Kristján 9. Danakóngur var afturhaldssamur og sýndi sjónarmiðum Íslendinga lítinn áhuga. Honum var umhugað um völd danska ríkisins. Blámáluð hönd hans er til að minna okkur á að stjórnarskráin sem hann færði Íslendingum var ekki sú stjórnarskrá sem landsmenn vildu og höfðu samið sér þegar árið 1851,“ segir í yfirlýsingunni.
Þá stendur að blámáluð hönd Kristjáns níunda eigi meðal annars að minna á að Íslendingar búi enn við danska stjórnarskrá.
„Blá hönd andlýðræðislegra stjórnarhátta, afturhalds og sérhagsmuna er enn á lofti og heldur í krepptum hnefa dauðahaldi um úrelta stjórnarskrá sem kjósendur hafa hafnað fyrir nýja. Bláu höndinni er umhugað um auð sinn og völd og hún gefur lítið fyrir vilja almennings. Að þessu sinni hefur hún aðsetur á Íslandi en ekki í Kaupmannahöfn,“ segir í yfirlýsingunni. Verið sé að koma í veg fyrir að landsmenn eignist stjórnarskrá sem þeir sjálfir hafi samið sér.
„Nóg er komið af því. Vér mótmælum öll!“ segir í yfirlýsingunni.
