\"Stærsti kostnaðarliður íslenskra heimila eru vextir. Við borgum meira fyrir lánin okkar en matinn. Þetta þekkist ekki í okkar nágrannalöndum. Eigum við að sætta okkur við þennan vaxtaþrældóm. Ég beini orðum mínum til jafnaldra minna í þessu pistli.\"
Þetta skrifar Katrín Kristjana Hjartardóttir í nýjasta tilskrifi sínu á hringbraut.is, en fyrri pistlar hennar um hlutskipti ungra Íslendinga hafa vakið athygli: \"Í dag voru að koma tölur um verðbólgu í janúar 2016 og reynist hún vera mínus 0,6%,\" bendir hún á - og minnir á þversögnina: \"Á sama tíma er verið að rukka okkur um 6-11% vexti af lánunum okkar. Hvað er í gangi,\" spyr Katrín Kristjana.
Hún segir þrældóm líðast á Íslandi: \"Venjuleg íslensk fjölskylda vinnur fyrstu tvo mánuði ársins bara fyrir vöxtum af húsnæðislánunum sínum umfram það sem fjölskyldur í nágrannalöndum okkar greiða. Það líkist því helst eins og íslensk heimili séu með yfirdráttarlán frekar en húsnæðislán. Þetta er skilgreining mín á vaxtaþrælkun!\"
Og hún áttar sig engan veginn á orðum ráðamanna: \"Þessir háu vextir eru útskýrðir af bönkunum sem áhættuálag vegna óstöðugs gjaldmiðils, krónunnar sem Sigmundur Davíð segir að sé „sá stöðugasti og sterkasti gjaldmiðill í heimi“. Ég bara spyr, hvað var maðurinn að reykja þennan dag þegar hann sagði þetta!\"
Hún spyr hvort það séu bankarnir okkar sem eru að bjóða okkur upp á þessu lélegu kjör? Nei svarið er einfalt, segir hún, því vandamálið sé krónan.
\"Það er sorgleg staðreynd,\" bendir hún á \"að ungt fólk sem vinnur hörðum höndum að geta eignast íbúð mun seint geta það því það endar sem vaxtaþrælar verðtryggingar sem er aðeins komin til vegna krónunnar.\"
