Landvernd, Eldvötn, Fjöregg, Fuglavernd, Náttúruverndarsamtök Austurlands, Náttúruverndarsamtök Suðvesturlands og Ungir umhverfissinnar hafa í sameiningu kvartað til eftirlitsnefndar Árósasamningsins vegna breytinga á lögum hérlendis um fiskeldi, sem þau telja brjóta gegn ákvæðum samningsins. Þetta kemur fram í tilkynningu frá samtökunum.
Í tilkynningunni segir að í byrjun október á síðasta ári hafi Alþingi breytt lögum um fiskeldi með frumvarpi sem samþykkt var samdægurs, eftir afar takmarkaðar umræður á Alþingi. Með frumvarpinu hafi Kristjáni Þór Júlíussyni sjávarútvegs- og landbúnaðarráðherra verið heimilað að gefa út bráðabirgðarekstrarleyfi til fiskeldisfyrirtækja. Þann 5. nóvember síðastliðinn hafi ráðherrann gefið út tvö slík bráðabirgðaleyfi.
Þar segir einnig að umhverfisverndarsamtökin sjö sem kvarta telji að við lagasetninguna og við útgáfu leyfa á grundvelli hennar hafi stjórnvöld brotið gegn skuldbindingum Íslands samkvæmt Árósasamningnum með eftirfarandi hætti:
„Við bráðabirgðaleyfisveitingu (sem getur verið til allt að 20 mánaða) samkvæmt hinum nýju lögum er ekki gert ráð fyrir þátttöku almennings og samtaka almennings eins og umhverfisverndarsamtökum við ákvarðanatökuna þannig að þessir aðilar geti komið sjónarmiðum sínum að áður en leyfi er veitt. Árósasamningurinn var m.a. gerður til þess að tryggja að fleiri raddir heyrðust þegar ákvarðanir um stórar framkvæmdir eða rekstrarleyfi eru teknar. Er það grundvöllur þess að sjónarmiðum náttúru- og umhverfisverndar sé gert jafn hátt undir höfði og öðrum sjónarmiðum.
Hin nýja löggjöf útilokar kærurétt umhverfisverndarsamtaka vegna leyfisveitinga til óháðs og hlutlaus aðila eins og úrskurðarnefndar umhverfis- og auðlindamála.
Þá telja samtökin að með lagasetningunni hafi Alþingi vegið mjög að sjálfstæði úrskurðarnefndar umhverfis- og auðlindamála gagnvart löggjafarvaldinu því lögin voru sett til að hægt væri að fella úr gildi úrskurði nefndarinnar.“
