Tveir vondir kostir

Formaður Verkalýðs- og sjómannafélags Keflavíkur og nágrennis segir erfitt fyrir starfsmenn að þiggja boð um hlutastarf hjá Airport Associates, en að það sé sömuleiðis erfitt að hafna því. Í gær var greint frá því að 205 af þeim 315 starfsmönnum sem Airport Associates sagði upp störfum yrði boðin staða hjá fyrirtækinu að nýju, en að það yrði í mörgum tilfellum í lægra starfshlutfalli og/eða með breyttum vaktatöflum. Mbl.is greinir frá.

„Þetta eru tveir vond­ir kost­ir. Ég öf­unda ekki fólkið af að þurfa að taka af­stöðu. Það er erfitt fyr­ir það að hafna boði um hlutastarf en einnig erfitt að þiggja það,“ seg­ir Guðbjörg Krist­munds­dótt­ir, formaður Verka­lýðs- og sjó­manna­fé­lags Kefla­vík­ur og ná­grenn­is, um þá ráðning­ar­samn­inga sem starfs­fólki Airport Associa­tes á Kefla­vík­ur­flug­velli eru boðnir.

Airport Associates sagði starfsmönnunum 315 upp í kjölfar gjaldþrots WOW air, sem var langstærsti viðskiptavinur fyrirtækisins, en um helmingur verkefna þess voru tengd flugfélaginu.

Í gær sagði Sigþór Krist­inn Skúla­son, for­stjóri Airport Associates, að alltaf hefði staðið til að bjóða hluta þeirra sem var sagt upp starf sitt að nýju. Hann sagði það þó nauðsyn­legt að breyta vakta­töfl­um og starfs­hlut­falli. Með því að minnka starfshlutfall gæf­ist kost­ur á að bjóða fleir­um að halda starfi og þannig væri mögulegt að minnka höggið.