Það voru merk tímamót þann 21. júlí 1969 þegar Neil Armstrong steig fyrstur manna fæti á tunglinu. Þar með hófst þriggja ára tímabil mannaðra geimferða til tunglsins en frá 1972 hefur enginn stigið þar fæti. Það eru auðvitað margar sögur sem tengjast þessum tunglferðum beint og óbeint. Ein þeirra er lítt kunn almenningi hún varð ungum manni til happs og kostaði hann síðan lífið að því að segja má.
Hún snýst um David Threlfall sem veðjaði 10 pundum 1964 um að menn myndu stíga fæti á tunglið eins og John F. Kennedy, Bandaríkjaforseti, sagði árið 1961 að myndi gerast innan áratugar. 10 pund voru mikill peningur á þessum tíma eða sem svarar til um 27.000 íslenskra króna á núverandi gengi. Samkvæmt umfjöllun airspacemag þá var Threlfall sá fyrsti sem veðjaði um þetta og því fékk hann góðar líkur þegar hann lagði undir eða 1:1.000. Threlfall var tvítugur þegar hann lagði pundin góðu undir.
Þetta skilaði honum góðri ávöxtun því fimm árum síðar lentu fyrstu mennirnir á tunglinu og stigu þar niður fæti. Threlfall gat því farið og sótt 10.000 pund á veðmálastofunni. Ef upphæðin er framreiknuð til núvirðis svarar þetta til um 27 milljóna íslenskra króna.
Threlfall sat í sjónvarpssal þegar lendingin á tunglinu var sýnd í beinni útsendingu en frést hafði af veðmáli hans.
En peningarnir urðu Threlfall ekki til mikillar hamingju því hann notaði þá til að kaupa sér kraftmikinn sportbíl. Hann lenti í slysi á bílnum í nóvember 1970 og lét lífið. Það má því kannski segja að veðmálið hafi orðið honum að bana þegar upp var staðið.
