Ríkisendurskoðun hefur gert athugaemdir við það að stjórnvöld verji tugmilljörðum króna í aðstoð við sauðfjárbændur án þess að ríkisvaldið skoði það með einhverjum hætti hvaða árangur hefur orðið af stuðningnum.
Fram kemur í Fréttablaðinu í morgun að rúmlega 38 milljörðum króna hafi verið varið til sauðfjárbænda á síðustu átta árum í samræmi við samning sem þá var gerður á milli ríkis og bænda um starfsskilyrði og eflingu sauðfjárræktar. Frá því samningurinn tók gildi hafa þessir fjármunirnir runnið til íslenskra bænda án þess að rríkisvaldið hafi nokkru sinni athugað hvernig peningunum var ráðstafað og hvort og hvernig þeir hafi komið að gagni.
Samningurinn átti fyrst og fremst að vera liður í því að styrkja sauðfjárrækt í landinu, en þær nýjungar voru að auki innleiddar með honum að bændur stunduðu sauðfjárræktina eftirleiðis í samræmi við umhverfisvernd, landkosti, sjálfbæra nýtingu og aukna markaðsvitund þeirra sjálfra og afurðastöðva.
Ef marka má athugasemdir Ríkisendurskoðunar hefur engin athugun farið fram á því að hálfu ríkisvaldsins hvort þessum markmiðum hafi verið náð með tæplega 40 milljarða króna framlagi úr ríkissjóði í málaflokkinn.
Sveinn Arason, ríkisendurskoðandi segir í samtali við Fréttablaðið í morgun að ríkið verði að herða sig í þessum efnum, ráðuneytið sem hér eigi í hlut verði að setja sér verklagsreglur um úttektir undir loks samningstíma og efla þannig samningsgerð og eftirlit.
Samningurinn er til tíu ára og rennur út árið 2017, eða eftir tvö ár.
