Donald J. Trump Bandaríkjaforseti hefur tilkynnt um tollar verði hækkaðir á innflutt ál og stál. Með þessu hyggst hann efla stál- og áliðnað í Bandaríkjunum, með það að markmiði að örva hagkerfið og fjölga störfum. Hann vill að það sé bandarískt ál og stál sem sé notað í framleiðslu í Bandaríkjunum.
Ekki hefur verið nákvæmlega útfært ennþá, hvernig staðið verður að tollahækkuninni, en Trump gaf í skyn að tollar á stál myndu hækka mun meira en á álið. Hækkunin yrði um allt að 25 prósent á stál og 10 prósent á áli.
Óhætt er að segja að bandarískur efnahagur sé háður stál- og álframleiðslu í öðrum ríkjum, því innflutningurinn á þessum tveimur burðarvirkjum í málmiðnaði hefur orðið mestur um sexfallt meiri en útflutningur á árs grundvelli.
Bandarískur bílaiðnaður hefur varað við því að gripið sé til þessara aðgerða þar sem slíkt gæti dregið úr samkeppnishæfni bandarísk bílaiðnaðar og kallað á mótaðgerðir annarra ríkja, eins og Kína. Með því gætu markaðir lokast og það gæti svo leitt til þess að aðgerðirnar færu þvert gegn markmiðum sínum, þannig að störfum myndi í reynd fækka.
Trump hefur talað fyrir nauðsyn þess að beita verndartollum til að örva bandaríska hagkerfið, og hefur það þegar verið leitt í regluverk, að tollar á innfluttar vörur, eins og þvottavélar, hafa hækkað mikið, eða um meira en 30 prósent.
Hér er vefur Kjarnans.
