Töluverð andstaða er meðal þingmanna við frumvarp um staðgöngumæðrun í velgjörðarskyni sem Kristján þór Júlíusson mælti fyrir á Alþingi í dag. Meirihlutinn telur að um réttlætismál sé að ræða.
Ekki síst hefur verið rætt á Alþingi í dag hvort einstaklingar „eigi rétt“ á að eignast börn og hvort bregðast verði við því með þessum lögum. Frumvarp ráðherra mun heimila staðgöngumæðrun í svokölluðu velgjörðarskyni ef það verður að lögum. Bent hefur verið á í þingumræðum að með því að heimila staðgöngumæðrun fari Ísland í allt aðra átt en Norðurlöndin. Fram hefur komið að staðgöngumæðrun sé bönnuð í langflestum samanburðarlöndum.
Rætt er um hættuna á misnotkun, hvaða vanda sé verið að leysa og hvort nýr vandi skapist. Þingmenn minnihlutans hafa ítrekað nefnt að þeir geri ekki lítið úr ógæfu þeirra sem ekki geta eignast barn en deilt er um „rétt“ fólks til að eignast barn, hvort sé réttur sér fyrir hendi. Þá hefur verið rætt að tæknifrjóvganir og ættleiðingar séu lögleg úrræði en það að selja líkama sinn með þessum hætti í velgjörðarskyni sé siðferðislega og mannfræðilega afar viðkvæmt. Þá sé erfitt að hafa eftirlit með því hvenær staðgöngumæðrun sé í velgjörðarskyni og hvenær hún sé stunduð í hagnaðarskyni. Mikið er rætt um rétt barnanna sjálfra í umræðunni sem nú stendur yfir.
Í stjórnarfrumvarpinu um staðgöngumæðrun segir að markmið laganna sé að „stuðla að vandaðri framkvæmd staðgöngumæðrunar í velgjörðarskyni til að tryggja hag og réttindi barns sem fæðist eftir staðgöngumæðrun, rétt, sjálfræði og velferð staðgöngumóður og fjölskyldu hennar og farsæla aðkomu væntanlegra foreldra.“
Lesa má frumvarpið hér.
